Мемлекет басшысының айтуынша, саяси партиялар кандидаттар тізіміне түрлі саланың тәжірибелі мамандарымен қатар жаңа буын өкілдерін де енгізген. Олардың арасында Президенттік кадр резервіне енген азаматтар болды.
«Жаңа буын өкілдері сайлау науқанына тың серпін бергені сөзсіз», – деді Қасым-Жомарт Тоқаев.
Президент саяси партиялардың белсенділігіне де тоқталды. Оның айтуынша, сайлау науқаны кезінде олар кәсіби біліктілігі мен жоғары дайындық деңгейін көрсетті. Сайлауға қатысушылар елдің келешек дамуына ықпал ете алатын бірқатар сындарлы ұсынысты ортаға салды.
Қасым-Жомарт Тоқаев азаматтардың саяси үдерістерге белсенді араласқанын да атап өтті. Сайлаушылар теледебаттар мен ашық пікірталастар барысында өз көзқарасын еркін білдіріп, партиялар ұсынған бағдарламалар мен бастамаларды талқылады.
Мемлекет басшысының пікірінше, азаматтардың белсенділігі мен пікірлер бәсекесі Қазақстандағы саяси мәдениеттің біртіндеп жаңарып жатқанын көрсетеді.
«Осының нәтижесінде қоғамда өзара құрмет, жауапкершілік пен пікір алуандығы құндылықтары орнығып, жаңа саяси мәдениет қалыптасып келеді», – деді Президент.
Қасым-Жомарт Тоқаев сайлау қорытындысы елдегі қоғамдық-саяси өзгерістерді және қазақстандықтардың мемлекеттік даму мәселелерін талқылауға қызығушылығы артып келе жатқанын көрсететінін айтты.
