Мемлекет басшысының тапсырмасымен биылғы оқу жылынан бастап мектептерде «Құқық негіздері» пәні енгізіледі. Бұдан бөлек, білім беру бағдарламасы «Конституция негіздері» және «Заң және тәртіп» курстарымен толықтырылады.
Президент бұл бастаманың негізгі мақсаты оқушылардың бойында Конституцияға, заңға және қоғамдағы тәртіпке құрмет қалыптастыру екенін айтты.
«Конституцияны құрметтейтін, заңға бағынатын жас ұрпақ қана өркендеген қоғам құрып, жеке әл-ауқатқа қол жеткізе алады», – деді Қасым-Жомарт Тоқаев.
Мемлекет басшысы кейбір жастар заң бұзудың салдарын толық түсіне бермейтініне назар аударды. Оның айтуынша, құқықтық нормаларды елемеу қылмыстық жауапкершілікке әкеліп, адамның кейінгі өміріне кері әсер етуі мүмкін.
Сондықтан мектептер оқушыларды заң негіздерімен таныстырып қана қоймай, құқықтық мәдениеттің күнделікті өмірдегі маңызын да түсіндіруге тиіс.
Қасым-Жомарт Тоқаев оқулықтардың мазмұнын қазіргі талаптарға және жаңа Конституцияда бекітілген қағидаттарға сәйкестендіруді тапсырды. Бұл жұмыстың сапалы әрі уақтылы орындалуына Үкімет пен бейінді министрлік жауапты болады.
