Ерлан Қариннің кандидатурасын депутаттық корпустың қарауына Мемлекет басшысы ұсынды. Конституцияға сәйкес вице-президентті Құрылтай депутаттары жалпы санының көпшілігі келіскен жағдайда Президент тағайындайды.
Вице-президент лауазымы 2026 жылғы 1 шілдеде күшіне енген Қазақстанның жаңа Конституциясында қарастырылған. Бұл тағайындау жаңартылған мемлекеттік органдар жүйесін қалыптастырудың негізгі кезеңдерінің бірі болды.
Вице-президент Мемлекет басшысының тапсырмасы бойынша оның Құрылтаймен, Үкіметпен және басқа да мемлекеттік органдармен өзара іс-қимылында Президент атынан өкілдік етеді. Қосымша өкілеттіктерді Мемлекет басшысы айқындайды.
Вице-президент өз міндетін атқару кезінде өкілді органның депутаты бола алмайды. Сондай-ақ оған өзге ақылы қызмет атқаруға, кәсіпкерлікпен айналысуға және саяси партияның мүшесі болуға тыйым салынады.
Жаңа қызметке тағайындалғанға дейін Ерлан Қарин Президент Әкімшілігі басшысының бірінші орынбасары болды. Бұған дейін Қазақстанның Мемлекеттік кеңесшісі және Мемлекеттік хатшысы қызметтерін атқарып, Президенттің саяси мәселелер жөніндегі көмекшісі әрі кеңесшісі болып жұмыс істеді.
Әр жылдары Ерлан Қарин Қазақстан Президенті жанындағы Қазақстан стратегиялық зерттеулер институтын және «Қазақстан» республикалық телерадиокорпорациясын басқарды. Ол — саяси ғылымдар кандидаты.
