Салтанатты рәсім 31 тамызда «Бішкек Арена» стадионында өтті. Ұйымдастырушылар бір қойылымда ұлттық мәдениетті, көшпенді халықтардың тарихын, музыка мен ұлттық киімдерді және заманауи визуалды әсерлерді үйлестірді.
Қатысушылар шеруі кештің ең әсерлі сәттерінің біріне айналды. Қазақстан құрамасы аренаға шыққанда көрермендер спортшыларды зор қошеметпен қарсы алды. Салтанаттан түсірілген бейнежазбалар әлеуметтік желілерде жылдам тарады.
«Қазақстанды таныстырған кезде қырғыздардың қалай қолдау көрсеткенін көрдіңіздер ме?» — деп жазды Threads қолданушысы kayna.zarova.
Қазақстандықтар көрші елді жарқын ашылу салтанатымен құттықтап, іс-шараның ұйымдастырылу деңгейіне жоғары баға берді. Қолданушылар рәсімді «әлемдік деңгейдегі нағыз шоу» деп атап, оны бүкіл өңірдің ортақ дамуының тағы бір көрінісі ретінде қабылдады.
Қазақстан делегациясының саны да көпшіліктің назарын аударды. Қолданушылар ұлттық құраманың ең ірі делегациялардың бірі болғанын атап, спортшыларға сәтті өнер көрсетуге тілектестік білдірді.
Қырғызстандықтар да ұйымдастырылған салтанатқа деген мақтаныштарын жасырмады. Қолданушылардың бірі әзілдеп, Қырғызстан тұрғындары ашылу рәсімінен алған әсерімен бөлісіп, «бір мақтанып алуы» үшін қазақтардан Threads желісін бірнеше күнге «бере тұруды» сұрады.
Талқылау біртіндеп спорттық шараның аясынан шығып, өңірлік ынтымақтастық тақырыбына ұласты. Жазбаларда бір елдің жетістігі бүкіл аймақ үшін ортақ қуанышқа айналып келе жатқаны айтылды. Астанада өткен Көшпенділер ойындарынан кейін эстафетаны қабылдаған Қырғызстан ортақ мәдениет пен дәстүрді өзіндік қырынан көрсетті.
Мұндай көршілік тек ресми кездесулер мен келісімдерден тұрмайды. Ол бір халықтың екінші елдің құрамасын шынайы ықыласпен қарсы алып, көршілердің оған құттықтау және қолдау сөздерімен жауап берген қарапайым сәттерінен де көрінеді.
VI Дүниежүзілік көшпенділер ойындары Қырғызстанда 31 тамыз бен 6 қыркүйек аралығында өтеді. Жарыстарға 100-ден астам елден үш мыңға жуық спортшы қатысып жатыр. Бағдарламаға 43 сайыс түрі, соның ішінде қазақтың ұлттық спорт түрлері енгізілген.
Спортшыларды алда жеңіс үшін тартысты бәсекелер күтіп тұр. Алайда ашылу салтанатына білдірілген пікірлердің өзі басты ойды аңғартты: Орталық Азия бірге өсіп келеді, ал көрші елдердің жетістігі барған сайын ортақ табыс ретінде қабылдануда.
