Қонаев қаласында «Amanat Drive» қаржы пирамидасына қатысты сот үкімі шықты. Қаржы мониторингі агенттігінің мәліметінше, ұйымның қызметінен 8 мыңнан астам адам зардап шеккен. Салымшылардан тартылған қаражаттың жалпы көлемі 21 млрд теңгеден асқан.
Сот шешімімен Шүкен К.К. кінәлі деп танылып, 8 жылға бас бостандығынан айырылды. Үрәтбек М.С. 1 жылға сотталды.
Үкім әзірге заңды күшіне енген жоқ.
Тергеу барысында қаржы пирамидасын ұйымдастырушылар азаматтарға жылжымайтын мүлік пен автокөліктерді пайызсыз сатып алуды, кейін оны бөліп төлеуді ұсынғаны анықталған.
Агенттік мәліметінше, заңсыз жолмен алынған кірістерді заңдастыру үшін 1,8 млрд теңгеден астам қаражат жарнамалық, талдау және басқа да қызметтерге төлем ретінде көрсетіліп, қолма-қол ақшаға айналдырылған.
Бұл қаражатқа екі пәтер және үш Lexus автокөлігі сатып алынған. Мүлік сенімді адамдардың атына рәсімделген.
Сот аталған мүлікті тәркілеу туралы шешім қабылдап, оны мемлекет кірісіне өткізді.
