Алқабилер Дэвисті атыс қаруын қолдану арқылы жасалған бірінші дәрежелі адам өлтіруге кінәлі деп таныды. Тергеу нұсқасы бойынша, ол шабуылды ұйымдастырып, көліктегі адамдардың біріне қару берген. Осы әрекеті үшін Дэвис қылмысқа тікелей қатысы бар адам ретінде жауапқа тартылған.
Дэвиске қатысты үкім 13 қазанда шығарылады. Оған мерзімінен бұрын босату мүмкіндігінсіз өмір бойына бас бостандығынан айыру жазасы тағайындалуы мүмкін. Дэвис сот шешіміне шағым жазатынын мәлімдеді.
Қылмыс болған күн
1996 жылғы 7 қыркүйекте Тупак Шакур Лас-Вегаста қарулы шабуылға ұшырады. Рэпер Death Row Records лейблінің негізін қалаушы Марион «Suge» Найтпен бірге BMW көлігінде келе жатқан. Сол кезде олардың жанына ақ түсті Cadillac көлігі келіп, одан рэпер отырған көлікке оқ атылды.
Тупак бірнеше жерінен жараланып, ауруханаға жеткізілді. Алайда алты күннен кейін, 13 қыркүйекте, 25 жастағы рэпер көз жұмды.
Қақтығыс неден басталды?
Прокуратураның мәліметінше, шабуылға Тупактың айналасындағы адамдар мен Дэвистің жиені Орландо «Baby Lane» Андерсон арасындағы жанжал себеп болған.
Атыс болғанға дейін Тупак пен оның серіктері MGM Grand казиносында Андерсонмен төбелесіп қалған. Жанжал кезінде Андерсон соққыға жығылған. Тергеу нұсқасына сәйкес, осыдан кейін Дэвис кек алуға шешім қабылдаған.
Ол тағы үш адаммен бірге ақ түсті Cadillac көлігіне отырып, Тупакты іздеген. Рэпер отырған көлікті тапқаннан кейін Дэвис жолаушылардың біріне қару берген. Артынша көлікке оқ атылған.
30 жылға созылған тергеу
Істің ұзаққа созылуына атысты тікелей жасаған адамның сот алдында жауап бермеуі себеп болды. Тупактың өліміне қатысы болуы мүмкін деген күдікке ілінген Орландо Андерсон 1998 жылы қаза тапты. Cadillac көлігінде болған өзге адамдар да кейін қайтыс болған.
Ал Дэвис бірнеше жыл бойы сол түні болған оқиға туралы көпшілік алдында айтып келді. 2019 жылы ол Compton Street Legend атты мемуарын жариялап, оқиғаға қатысты өз нұсқасын баяндады. Оның сұхбаттары мен мәлімдемелері кейін тергеу үшін маңызды дәлелдердің біріне айналды.
Қорғау тарапы Дэвистің сөздеріне күмән келтіріп, оның кейбір мәлімдемелерін танымал болу және кітап сатылымын арттыру үшін асыра айтуы мүмкін екенін алға тартты.
Соған қарамастан, алқабилер прокуратура келтірген дәлелдерді жеткілікті деп тауып, Дэвисті кінәлі деп таныды. Осылайша ол Тупак Шакурдың өлімі бойынша сотталған алғашқы адам атанды.
Бүгінгі таңда, Тупак Шакурға нақты кім оқ атқаны туралы сұрақ әлі де жауапсыз қалуда.
