Оқиға «Aqtogai Milk» ЖШС-де кәріз құдығында жұмыс жүргізу кезінде болған. Жұмысшылардың бірі күкіртсутектен уланып қалған. Оны құтқаруға әрекет жасаған әріптестері кезекпен құдыққа түскен. Алайда олар да улы газдан уланып, қаза тапқан.
Комиссияның анықтауынша, марқұмдар қаупсіздік техникасы бойынша қажетті оқытудан өтпеген және жеке қорғаныс құралдарымен қамтамасыз етілмеген. Сонымен қатар, құдықтағы апатты жағдай кезіндегі құтқару жұмысы барысында қауіпсіздік шаралары орындалмағаны анықталды.
Тергеу қорытындысы бойынша жұмыс берушінің кінәсі 100% деп белгіленді. Комиссия жауапты лауазымды тұлғаларды анықтап, заңбұзушылықтарды жою және апатты жағдайлардың алдын алу бойынша ұсыныстар әзірледі.
Еңбек және халықты әлеуметтік қорғау министрлігі жұмыс берушілерді кәріз құдықтарында, резервуарларда, сыйымдылықтарда және басқа да жабық кеңістіктерде жұмыс жүргізу кезінде қауіпсіздік талаптарын қатаң сақтауға шақырды.
