Тазы еліміздің мәдени мұрасының бір бөлігі саналады және қазақ халқының «Жеті қазынасына» кіреді. Бұл тұқым адалдықтың, ептілік пен күштің нышаны ретінде бағаланады. Тазы мен төбет ғасырлар бойы Ұлы дала тұрғындарына серік болып, аңшылықта көмектесіп, мал-мүлкін қорғаған.
Соңғы жылдары Қазақстанда ұлттық ит тұқымдарын сақтауға бағытталған жұмыстар күшейтілді. 2024 жылы тазы халықаралық деңгейде алдын ала мойындалды, ал Қазақстан осы тұқымның шыққан елі ретінде ресми түрде бекітілді.
Сонымен қатар елімізде тұқымдық база кеңейтіліп, Қазақ ит тұқымдарының ұлттық орталығының құрылысы аяқталуға жақын.
Президенттің баспасөз хатшысы Айбек Смадияровтың айтуынша, жаңа мерекенің белгіленуі тазы мен төбетті дәріптеуге, тарихи мұра мен ұлттық дәстүрлерді сақтауға қосылған тағы бір үлес болмақ.
