Астанада Қазақстан Президенті Қасым-Жомарт Тоқаев пен Лаос Президенті Тхонглун Сисулиттің қатысуымен екі ел арасында қол қойылған үкіметаралық құжаттармен алмасу рәсімі өтті.
Тараптар төрт өзара түсіністік туралы меморандумға қол қойды. Құжаттардың бірі Қазақстан мен Лаос сыртқы істер министрліктері арасындағы саяси консультацияларды дамытуға бағытталған.
Екінші меморандум Қазақстанның Бас прокуратурасы мен Лаостың Жоғарғы халық прокуроры прокуратурасы арасындағы ынтымақтастықты көздейді.
Сондай-ақ ақпараттық-коммуникациялық технологиялар және электронды мемлекеттік қызметтер саласындағы өзара іс-қимыл туралы келісім жасалды.
Бұдан бөлек, Астана мен Лаостың астанасы Вьентьян арасында бауырлас қала қатынастары орнатылды.
Кездесу барысында мемлекет басшылары саяси, сауда-экономикалық және мәдени-гуманитарлық байланыстарды одан әрі дамыту мәселелерін талқылады.
