3 қыркүйекте Астанада өткен Энрике Иглесиастың концерті көрермендер арасында түрлі пікір туғызды. Әлеуметтік желі қолданушылары шараның ұйымдастырылуын, дыбыс сапасын, концерттің кеш басталғанын және қысқа болғанын сынға алды, деп хабарлайды SHYNDYK.KZ.
Концерт сағат 20:00-де басталуы керек болған, алайда әнші сахнаға шамамен 20:40-та шыққан. Көрермендердің айтуынша, өнер көрсету бір сағатқа жуық уақытқа созылған. Бірқатар адам бірнеше сағат күткеннен кейін концерттің тым қысқа болғанына наразы болды.
Дыбыс сапасына да шағым көп айтылды. Көрермендер Энрике кей сәттерде өзін дұрыс ести алмай, микрофонын реттеумен болғанын атап өтті. Әнші микрофонды бірнеше рет көрермендерге де ұсынған. Соның салдарынан кейбір әндер кезінде үзілістер болған.
Әртістің сахнадағы өнер көрсету мәнері де көпшіліктің көңілінен шықпаған. Кей көрермендер оның қойылымын жеткілікті деңгейде белсенді әрі эмоциялық болмады деп бағалады. Олардың сөзінше, әнші сахнада көбірек жүріп, көрермендермен аз байланыс орнатқан.
Дегенмен концертке риза болғандар да бар. Олар Энрикенің энергиясын атап, сүйікті әндерін бірге айтып, билеп, әлемдік жұлдызды Қазақстанда тікелей көру мүмкіндігіне қуанған.
Әлеуметтік желіде билет бағасы да талқыланды. Көрермендердің айтуынша, кей билеттердің құны 300–500 мың теңгеге дейін жеткен. Осыған байланысты көңілі толмаған көрермен концерттің сапасы билет бағасына сай болды ма деп сынға алуда.
Көрермендер Алматыда өтетін концертке баруды жоспарлаған көрермендерге Астанадағы шараның тәжірибесін ескеріп, шешім қабылдауға кеңес беруде. Энрике Иглесиастың Алматыдағы концерті 5 қыркүйек күні Орталық стадионда өтеді.
