Аринов бұл қызметте Марат Сұлтанғазиевті алмастырды. Президенттің басқа Жарлығымен Сұлтанғазиев Алматы облысының әкімі лауазымынан босатылды. Кадрлық шешімнің себебі ресми түрде айтылған жоқ.
Шыңғыс Аринов әкім болып тағайындалғанға дейін Төтенше жағдайлар министрлігін басқарды. Ол ведомство басшысы қызметіне 2024 жылғы ақпанда келген еді. 2026 жылғы қыркүйекте ТЖМ басшысы болып Мұрат Мұханов тағайындалды.
Шыңғыс Аринов 1983 жылы Алматы облысында дүниеге келген. Әл-Фараби атындағы Қазақ ұлттық университетін «Халықаралық қатынастар», Қазақ еңбек және әлеуметтік қатынастар академиясын «Құқықтану» мамандығы бойынша, сондай-ақ Азаматтық авиация академиясын тәмамдаған.
2006–2022 жылдары Аринов Мемлекеттік күзет қызметінде офицерлік және басшылық лауазымдар атқарды. 2022 жылғы қаңтарда Мемлекеттік күзет қызметі бастығының орынбасары — Президент күзеті қызметінің бастығы болып тағайындалды.
Марат Сұлтанғазиев Алматы облысын 2022 жылғы маусымнан бері басқарды. Бұған дейін салық органдарында, Президент Әкімшілігі мен Қаржы министрлігінде жұмыс істеген. Әр жылдары Мемлекеттік кірістер комитетін басқарып, қаржы вице-министрі және бірінші вице-министрі қызметтерін атқарды.
Сұлтанғазиев қаржы және құқық салалары бойынша білім алған, іскерлік әкімшілендіру магистрі дәрежесіне ие. Осылайша, ол өңірді төрт жылдан астам басқарғаннан кейін әкім қызметінен кетті.
