Шешім инфляцияның баяулауы аясында қабылданды. Тамызда жылдық инфляция 9,8%-ға дейін төмендеді. Дезинфляциялық үдеріс 11 ай қатарынан жалғасып келеді.
Жемістер мен көкөністердің арзандауы, сондай-ақ импорт бағасының төмендеуі нәтижесінде азық-түлік инфляциясы 9,5%-ға дейін баяулады. Азық-түлікке жатпайтын тауарлар инфляциясы 11,4%, қызмет көрсету саласындағы инфляция 8,9% болды. Бір ай ішінде баға 0,6%-ға өсті.
Халықтың алдағы бір жылға қатысты инфляциялық болжамы маусымдағы 13,4%-дан шілдеде 12,1%-ға дейін төмендеді. Бұл ретте Ұлттық банк негізгі тәуекелдердің қатарында жанар-жағармай бағасының ықтимал өсуін, тұрғын үй-коммуналдық қызметтер тарифтерінің өзгеруін, ішкі сұраныстың күшеюін және әлемдік азық-түлік пен энергия тасымалдаушылар бағасының қымбаттауын атады.
2026 жылға арналған инфляция болжамы 9–11% шегінде сақталды. 2027 жылға қатысты болжам жоғары қарай қайта қаралып, 6,5–8,5% деңгейінде белгіленді. Инфляцияның орта мерзімді 5% нысаналы көрсеткішке оралуы 2028 жылы күтіледі.
Қазақстан экономикасының өсімі 2026 жылы 4,5–5,5% деңгейінде болжанып отыр. 2027 жылы жалпы ішкі өнім шамамен 4,5%-ға, ал 2028 жылы 4–5%-ға өсуі мүмкін.
Ұлттық банк инфляцияның оң динамикасы базалық мөлшерлемені төмендетуге мүмкіндік бергенін атап өтті. Алайда инфляциялық қысымды күшейтетін тәуекелдердің сақталуына байланысты мөлшерлемені одан әрі азайту мүмкіндігі әзірге шектеулі.
Базалық мөлшерлемеге қатысты кезекті шешім 2026 жылғы 23 қазанда Астана уақытымен сағат 12:00-де жарияланады.
