Қаза тапқан матрос Жүсіп Оразалиевтің әкесі ұлының қазасы туралы отбасыға әкімдік, полиция және әскери комиссариат өкілдері хабарлағанын айтты. Олар туыстарының үйіне келіп, әскери қызметшінің Ақтаудағы мәйітханада жатқанын жеткізген. Отбасының сөзінше, Каспийдегі оқу-жаттығу кезінде қатты толқын көтеріліп, әскери қызметшілер қаза тапқан.
Қызмет мерзімінің аяқталуына аз уақыт қалғандықтан, бұл хабар жақындарына ерекше ауыр тиген. Туыстарының айтуынша, әскери қызметшілер шамамен бір аптадан кейін үйлеріне оралуы керек еді. Отбасылары оларды күтіп, ұлдарымен жақын арада қауышамыз деп үміттенген.
Туыстары мұндай ауа райында оқу-жаттығудың не себепті өткізілгенін түсінбей отыр. Олардың айтуынша, бір күн бұрын 112 қызметі дауылды ескерту таратқан. Соған қарамастан әскери қызметшілер теңізге жіберілген.
Жүсіп Оразалиевтің әкесі оқу-жаттығуды ұйымдастырушылар ауа райы мен құтқару қызметтерінің ескертуін ескеруі керек еді деп санайды. Ол үйлеріне қайтуына санаулы күн қалған әскери қызметшілердің өміріне неліктен қауіп төндірілгенін түсінбейтінін айтты.
Енді қаза тапқандардың отбасылары дауылды ескертуге қарамастан әскери қызметшілердің неге теңізге жіберілгені туралы сұраққа жауап күтуде.
