Алматы тұрғындарының сумен жабдықтау және кәріз қызметтері үшін берешегі 550 миллион теңгеден асты. «Алматы Су» компаниясы төлемді уақытында өтемеген тұрғындардың суы тоқтатылуы мүмкін екенін ескертті.
Компания мәліметінше, қарыздың басым бөлігі жеке тұрғын үйлерге тиесілі. Бұл сектордағы берешек 300 миллион теңгеден асқан. Ал көпқабатты үйлердің тұрғындары шамамен 250 миллион теңге қарыз.
«Алматы Су» коммуналдық қызмет ақысын әр айдың 25-іне дейін қоса алғанда төлеу қажет екенін еске салды. 26-сынан бастап мерзімі өткен төлемге өсімпұл есептеледі.
Қарыз ұзақ уақыт өтелмесе, компания су беруді шектеуі немесе толық тоқтатуы мүмкін. Алайда мұндай шара қолданылмас бұрын тұтынушыға кемінде үш күн бұрын ескерту берілуі тиіс.
Берешекті сот арқылы өндіріп алу да қарастырылған. Мұндай жағдайда тұрғын негізгі қарызбен қатар есептелген өсімпұл мен сот шығындарын да өтеуге міндеттелуі мүмкін.
