13 қазанда e-Qazyna порталында 2017–2018 жылдары шығарылған автобустар саудаға қойылды. Құжаттарға сәйкес, көліктердің техникалық жағдайы нашар, оларды қайта пайдалануға беру үшін жөндеу қажет.
Автобустарды сатуға Іле ауданының экономика және қаржы бөлімі шығарған. Ал көліктер аудандық тұрғын үй-коммуналдық шаруашылық және тұрғын үй инспекциясы бөлімінің балансында болған.
Мәселен, 2018 жылғы ЛИАЗ-529265 автобусының бастапқы бағасы 765 672 теңге болған. Бағалау құны 255 224 теңге деп көрсетілгенімен, сауда қорытындысында көлік 50 512 теңгеге сатылды. Яғни бастапқы бағасынан 15 еседен астам арзанға өтті.
Тағы бір ЛИАЗ-529260 автобусы 570 717 теңгеге ұсынылып, 48 658 теңгеге сатылған.
Жарияланған мәліметтерге сүйенсек, автобустардың баланстық құны нөл теңге. Қазір көліктер Алатау қаласының Жетіген шағынауданында орналасқан.
Алайда саудаға қойылған автобустардың барлығы сатылған жоқ. Кейбір лоттар бойынша сатып алушы табылмай, аукцион өтпеді деп танылды.
Сауда бағаны төмендету тәсілімен өткен. Бұл әдіс бойынша көліктің құны сатып алушы табылғанға дейін біртіндеп төмендетіледі.
