Президент Қасым-Жомарт Тоқаев Қауіпсіздік Кеңесінің отырысында әскери реформа жоспарын мақұлдады. Құжатта мерзімді әскери қызмет тәртібін өзгерту, Ұшқышсыз жүйелер күштерін құру және сарбаздардың қауіпсіздігін күшейту көзделген. Негізгі өзгерістер 2027 жылы жүзеге асырылады.
Мемлекет басшысы қысқа мерзім ішінде заманауи, ұтқыр әрі технологиялық тұрғыдан озық армия қалыптастыруды тапсырды. Реформа Қарулы Күштерді басқару, әскери қызметшілерді даярлау, кадр саясаты, әскери білім беру, қорғанысты жоспарлау және техникалық жарақтандыру салаларын қамтиды.
«Әскери қызметтің қауіпсіздігіне, әскерге басшылық ету мәдениетіне және мемлекет ресурстарын тиімді пайдалануға айрықша мән беру керек. Армияның қоғаммен қарым-қатынасы да өзгеруге тиіс. Кешенді реформа қажет», – деді Тоқаев.
Мерзімді әскери қызмет тәртібі өзгереді
Реформа аясында мерзімді әскери қызмет екі кезеңге бөлінбек. Әскерге шақырылғандар алғашқы алты айда оқу орталықтарында даярлықтан өтеді. Кейінгі алты айда әскери бөлімдерде қызмет етіп, жауынгерлік дайындыққа және бөлімше құрамында міндеттерді орындауға басымдық береді.
Осылайша, мерзімді әскери қызметтің жалпы ұзақтығы өзгермейді. Алайда сарбаздарды даярлау жүйесі қайта ұйымдастырылады.
Қазақстанда Ұшқышсыз жүйелер күштері құрылады
Жоспар бойынша Қарулы Күштердің құрылымы мен құрамы қайта қаралады. Әскерді басқару және қорғанысты жоспарлау тетіктері жетілдіріліп, Ұшқышсыз жүйелер күштері құрылады.
Қауіпсіздік Кеңесі Төрағасының орынбасары Аида Балаева таныстырған құжат халықаралық тәжірибе, қазіргі заманғы ұрыс жүргізу тәсілдері және отандық мамандардың ұсыныстары негізінде әзірленген.
Сарбаздардың қауіпсіздігіне бақылау күшейеді
Әскери қызметшілердің құқықтарын қорғау үшін Әскери консультанттар мен Әскери қызметшілер істері жөніндегі уәкіл институттарын құру жоспарланып отыр.
Сонымен қатар әскердегі жарғыға қайшы әрекеттердің алдын алу, әскери тәртіпті күшейту және басқару мәдениетін жетілдіру шаралары қарастырылған.
Реформа аясында «Адал азамат» тұжырымдамасына негізделген «Жас айбын» әскери-патриоттық даярлық жүйесі дамытылады. Мамандандырылған әскери мектептер желісін кеңейту және бастапқы әскери даярлықты жетілдіру де жоспарланған.
Реформаның негізгі кезеңі 2027 жылға белгіленді
Қорғаныс министрі Айдос Мырзахметов отырыста Қарулы Күштерді жаңғырту жоспары туралы баяндады.
Жоспарға сәйкес, ұйымдастыру шаралары 2026 жылдың соңына дейін аяқталуы тиіс. Ал негізгі тұжырымдамалық өзгерістер 2027 жылы іске асырылады.
Сонымен бірге Қарулы Күштердің жаңа ақпараттық-коммуникациялық стратегиясы қабылданып, «Заң мен тәртіп» қағидатына сәйкес тәрбие жұмыстары күшейтіледі.
Президент Қорғаныс министрлігінің қызметін кешенді тексеру жөніндегі комиссияның жұмысын жыл соңына дейін аяқтауды тапсырды.
Әскери реформа жоспары Қауіпсіздік Кеңесінің отырысында мақұлданды. Оның орындалуын үйлестіру Үкімет пен Қауіпсіздік Кеңесіне жүктелді.
