Алматыдағы «Монблан» клубтық үйінің құрылысына қаржы салған адамдардың уәде етілген пәтерлеріне қол жеткізе алмай, әділдік іздеп жүргеніне төртінші жыл болған. Жәбірленушілер қазіргі сот процесіне күмәнмен қарайтындарын айтып, бейнеүндеу жариялады.
Үлескерлердің мәлімдеуінше, сот олардың істі қосымша тергеуге жіберу туралы өтінішін қанағаттандырмаған. Инвесторлардың басты шағымы — қазіргі таңда айыпталушы орындығында отырған тұлғалардың құрылыс жобасын жүзеге асыруға жауапты ЖШС-ге заңдық тұрғыда ешқандай қатысы жоқ екендігінде. Осыған байланысты жәбірленушілер қосымша тергеу жүргізуді табанды түрде талап етуде.
Аталған мәлімдемелерді құқықтық тұрғыдан мұқият тексеріп, объективті баға беру мақсатында SHYNDYK.KZ редакциясы Алматы қаласының әкімдігі мен сотына ресми сауал жолдады. Құзырлы органдардың жауабы келген бойда олардың ұстанымы жарияланатын болады.
