Алматыдағы қоғамдық көліктердің бірінде жолаушылар қатты сөз қақтығысының куәсі болды. Оқиға орнындағы адамдардың айтуынша, мас ер адам жолаушы қыздың сырт келбетіне тиісіп, оның «дұрыс киінбегенін» айтып, ақылсымақсыған.
Алайда бойжеткен бұл орынсыз сынды үнсіз тыңдап қалмай, ер адамға балағат сөздермен қатты тойтарыс берген. Салдарынан автобус ішіндегі жанжал ушығып, басқа жолаушылардың назарын аударған. Желіде тараған оқиғаның видеосы қолданушылар арасында қызу талқыға түсті.
Алматы қалалық Полиция департаменті аталған бейнежазба бойынша тексеру жүргізілгенін мәлімдеді. Тәртіп сақшылары жанжалға қатысушылардың жеке басын анықтады. Тексеру қорытындысы бойынша жанжалға қатысушылардың біріне (қоғамдық орында былапыт сөз сөйлегені үшін) қатысты әкімшілік хаттама толтырылды. Іс материалдары тиісті шешім қабылдау үшін әкімшілік сотқа жолданды.
