Португалияда тұрғын үй бағасы мен жалдау ақысының қымбаттауына қарсы мыңдаған адам көшеге шықты. Лиссабонда полиция наразылық білдірушілердің шатырлы лагерін таратып, 55 адамды ұстады. Алайда тұрғындар баспана саясаты өзгермейінше шеруді тоқтатпайтынын мәлімдеді.
20 қазан күні таңертең полиция Лиссабонның орталығындағы Россиу алаңында орналасқан шатырлы лагерьді таратуға кірісті. Мұнда бірнеше күн бойы 200-ге жуық шатыр тігілген. Наразылық білдірушілер алаңнан кетуден бас тартып, бір-бірінің қолынан ұстап, полицияға тосқауыл қоюға тырысты. Артынша қақтығыс болып, тәртіп сақшылары күш қолданды.
Операция барысында 228 шатыр құрылымы тәркіленді. Полицияның мәліметінше, екі адам жеңіл жарақат алған. Ұсталған 55 адам кейін сотқа келу міндеттемесімен босатылды. Порту қаласында да шатырлы лагерь таратылды, бірақ ол жерде ірі қақтығыс тіркелмеді.
Наразылықтың басты себебі – тұрғын үйдің қолжетімсіздігі және үкімет ұсынған заңнамалық өзгерістер. Шерушілер жалға алушыларды баспанадан шығаруды жеңілдететін және жаңа жалдау келісімшарттары бойынша баға шектеулерін алып тастайтын заң жобасына қарсы. Құжат парламентте алғашқы қараудан өткен.
Reuters мәліметінше, 2017 жылдан бері Португалияда тұрғын үй сатып алу бағасы екі еседен астам өскен. Жаңа келісімшарттар бойынша жалдау ақысы да шамамен екі есеге қымбаттаған. Бұл жағдай әсіресе Лиссабон мен Порту тұрғындарына ауыр тиіп отыр.
Полиция лагерлерді таратқаннан кейін де наразылық тоқтаған жоқ. Мыңдаған адам қайтадан орталық алаңдарға жиналды. Белсенділер шатырларды қайта орнатып, үкіметтен тұрғын үй саясатын өзгертуді талап етпек.
