Қазақстандық паралимпиадашы, көру қабілетінен айырылған Светлана Макеева билікке тағы да үндеу жолдады, деп хабарлайды SHYNDYK.KZ. Ол 2006 жылы мүмкіндігі шектеулі жандар арасындағы Азия-Тынық мұхиты ойындарында бір алтын және үш күміс медаль жеңіп алған. Алайда тарихи жетістігіне қарамастан, тиісті пәтер мен ақшалай сыйлыққа қол жеткізе алмаған. Қазіргі таңда 2% ғана көретін спортшы 80 жастағы әкесімен бірге 110 800 теңге жәрдемақыға өмір сүріп жатыр. Оның айтуынша, бұл қаржы тек коммуналдық төлемдерге ғана жетеді, ал дәрі-дәрмекке ақша қалмайды.
Спортшының сөзінше, жарыстан оралған соң оған халықаралық дәрежедегі спорт шебері атағы берілген, бірақ материалдық игіліктер бұйырмаған. Шенеуніктер ол кезде спортшыларды марапаттау жарғысында «паралимпиадашы» деген сөздің болмағанын алға тартқан. Светлана Макеева: «Қазақстанның туын сол ойындарда алғаш рет мен көтердім. Паралимпиада қозғалысы менен басталды», – деп, бұл уәжді әділетсіздік санайды.
Биыл маусым айында Алматы қалалық спорт басқармасы Макееваға төлемдердің берілмеуін оның 2008 жылғы Бейжің Паралимпиадасында 4-орын алғанымен түсіндірген. Алайда шенеуніктер 2006 жылғы Азия ойындарындағы нақты жеңістерге (алтын және күміс медальдарға) неге назар аудармай отырғаны түсініксіз.
Қазіргі уақытта Светлана Макеева Президентке және Спорт министрлігіне хат жолдаған. Өз кезегінде SHYNDYK.KZ редакциясы Туризм және спорт министрлігіне ресми сауал жіберіп, чемпионға не себепті тиісті сыйақы мен баспана берілмегенін және қазіргі жағдайда қандай әлеуметтік көмек көрсетілуі мүмкін екенін сұрады. Министрліктің жауабы келген бойда жарияланатын болады.
