Түркістан облысында әлеуметтік сала мамандары Отбасының цифрлық картасы бойынша әл-ауқаты жақсы («А» және «В») деп танылған отбасылардың үйлерін жеке-жеке аралап жатыр. Бұған жергілікті тұрғынның үйіне келген мамандар туралы әлеуметтік желіде жариялаған видеосы түрткі болды.
Облыстық жұмыспен қамтуды үйлестіру және әлеуметтік бағдарламалар басқармасының түсіндіруінше, бұл шара халықтың нақты тұрмыстық жағдайын бағалау және алдағы өзгерістерді түсіндіру мақсатында жүргізілуде. Себебі 2027 жылдың 1 қаңтарынан бастап мемлекеттік жәрдемақының 36 түрінің 14-іне нақты мұқтаждық қағидаты енгізілмек.
Отбасының әл-ауқатын таразылау кезінде табыс көлемі, жұмыспен қамтылуы, жылжымайтын мүлік пен көліктің бар-жоғы сияқты кешенді факторлар ескеріледі. Дегенмен, мамандар жеке баспана немесе автокөліктің болуы төлемнен автоматты түрде бас тартуға негіз болмайтынын нақтылады. Әзірге мұндай үй аралап тексеру жұмыстары тек Түркістан облысында ғана байқалуда, еліміздің өзге өңірлерінде дәл осындай тексерістердің басталғаны туралы ақпарат жоқ.
