Президент Қасым-Жомарт Тоқаев Испанияның «Атлетико Мадрид» футбол клубының бас директоры Мигель Анхель Хиль Маринді қабылдады. Мемлекет басшысы оны Қазақстан футболын дамытуға қосқан үлесі үшін II дәрежелі «Достық» орденімен марапаттады.
Кездесу барысында Тоқаев испандық клубпен қалыптасқан ынтымақтастыққа оң баға беріп, Хиль Мариннің сапары екіжақты серіктестікті жаңа деңгейге көтеруге мүмкіндік беретініне сенім білдірді.
Президент Қазақстанда футбол инфрақұрылымын дамыту, жаттығу базаларын салу және жас футболшыларды даярлау бағытында атқарылып жатқан жұмыстарға тоқталды. Сондай-ақ елдегі футбол клубтарының басым бөлігін жекешелендіру жұмыстары жалғасып жатқанын айтты.
Бұдан бөлек, Қазақстан ФИФА-мен бірлесіп, еліміздің барлық өңірінде балаларға арналған 100-ден астам жаңа футбол алаңын салуды жоспарлап отыр.
Мемлекет басшысы Испания құрамасы мен испан футбол мектебінің жетістіктерін атап өтіп, отандық футболшылардың жаңа буынын даярлауда олардың тәжірибесін пайдалануға Қазақстан мүдделі екенін жеткізді.
Өз кезегінде Мигель Анхель Хиль Марин Қазақстанда футболды дамытуға көңіл бөлгені үшін Президентке алғыс айтты. Ол Алматы облысындағы «Атлетико Мадрид» академиясының инфрақұрылымын жоғары бағалап, болашақта оның үздік футбол оқу-жаттығу кешендерінің біріне айналуы мүмкін екенін атап өтті.
