Оқиға 13 қараша күні сағат 10:28 шамасында Ақтөбе қаласындағы Тәуелсіздік даңғылы, 14/1 мекенжайында болған.
Алдын ала мәлімет бойынша, бес қабатты тұрғын үйдің бірінші қабатында орналасқан дәмханада газ бен ауа қоспасы жарылған. Соның салдарынан дәмханаға жапсарлас салынған құрылыс қирап, артынша өрт шыққан.
Жарылыстың күшті болғаны соншалық, тұрғын үйдің терезелері де шытынап, сынған.
Оқиға салдарынан екі адам зардап шегіп, екеуі де қалалық №1 көпбейінді ауруханаға жеткізілді.
Ақтөбе облыстық денсаулық сақтау басқармасының мәліметінше, жедел жәрдем қызметіне шақырту сағат 10:28-де түскен. Арада бір минут өткенде оқиға орнына екі медициналық бригада жеткен.
Дәрігерлердің айтуынша, екі науқастың да жағдайы тұрақты, өмірлеріне қауіп төніп тұрған жоқ. Қазір оларға қажетті медициналық көмек көрсетіліп жатыр.
Жарылыс болған жерге Ақтөбе облыстық төтенше жағдайлар департаментінің қызметкерлері де жедел жеткен. Өртті сөндіруге және жарылыстың зардаптарын жоюға 45 құтқарушы мен 10 техника жұмылдырылған.
Өрт сағат 10:53-те толық сөндірілді. Қаза тапқандар жоқ.
Қазір мамандар жарылыстың неден болғанын анықтап, оқиғаның мән-жайын тексеріп жатыр.
