Астанадағы Atlant-6 тұрғын үй кешенінің маңынан доллар іздегендер көбейді. Ақша толы чемодандар туралы хабар тарағаннан кейін кейбір тұрғындар түн ішінде сол жерге барып, айналаны шолып шыққан.
Бұған «Самұрық-Қазына» қорының басқарма төрағасы Нұрлан Жақыповтың ұсталуына қатысты тараған ақпарат себеп болған.
SHYNDYK.KZ дереккөздерінің мәліметінше, құқық қорғау органдарының қызметкерлері келген кезде Нұрлан Жақыповтың жұбайы қорыққанынан терезеден ақша салынған сегіз чемоданды лақтырып жіберген болуы мүмкін. Алайда бұл ақпарат әзірге ресми түрде расталған жоқ.
Бұған дейін полицияның 102 нөміріне Atlant-6 тұрғын үй кешенінің кіреберісіндегі пандус маңында чемодандар мен АҚШ долларына ұқсас купюралар шашылып жатқаны туралы хабар түскені айтылған. Оқиға орнына полиция қызметкерлері барғанымен, тексерудің қорытындысы әлі жарияланған жоқ.
12 қарашада Ұлттық қауіпсіздік комитеті «Самұрық-Қазына» қорының басқарма төрағасы Нұрлан Жақыповтың, «Қазақстан темір жолы» ұлттық компаниясының басшысы Елжас Отыншиевтің және тағы бірнеше адамның жемқорлық қылмысына күдікпен ұсталғанын растады.
SHYNDYK.KZ дереккөздерінің нақтыланған мәліметіне сүйенсек, сөз болып отырған пара көлемі 6 миллион доллар болуы мүмкін. Бұл сомаға қатысты да әзірге ресми растау жоқ.
ҰҚК қазір істің мән-жайы анықталып жатқанын мәлімдеді. Тергеуге қатысты өзге ақпарат Қылмыстық-процестік кодекстің 201-бабына сәйкес жарияланбайды.
Ал елордада чемодандар жайлы әңгіме әлі басылар емес. Желіде тараған бейнежазбаларда бір топ адамның тұрғын үй кешенінің ауласын аралап, жерге үңіліп, ақша іздеп жүргенін көруге болады.
Түн ішінде доллар іздеп шыққандардың ең болмаса бір 100 долларлық купюра тапқаны белгісіз.
