Қазақстан Президенті Қасым-Жомарт Тоқаев Сеулге мемлекеттік сапары барысында Оңтүстік Кореяда білім алып, еңбек етіп жүрген Қазақстан азаматтарымен кездесті.
Жүздесу кезінде Мемлекет басшысы отандастарымен пікір алмасып, Қазақстанда жүзеге асырылып жатқан саяси реформалар мен әлеуметтік-экономикалық өзгерістер туралы айтты. Атап айтқанда, елдегі реформалардың негізгі бағыттары және азаматтардың әл-ауқатын арттыруға бағытталған жұмыстар сөз болды.
Оңтүстік Кореяда тұрып жатқан қазақстандықтар өздерінің оқуындағы және кәсіби қызметіндегі жетістіктері туралы әңгімелеп, алдағы мақсаттары мен жоспарларымен бөлісті.
Кездесу барысында шетелде білім алып, еңбек етіп жүрген қазақстандықтардың тәжірибесі мен кәсіби дамуы да назарға алынған.
Жүздесу соңында Қасым-Жомарт Тоқаев студенттерге оқуында табыс тіледі. Ал Оңтүстік Кореяда тұрып жатқан барлық қазақстандықтарға амандық, жұмыстарына жетістік және жаңа белестер тіледі.
