Еліміздің жетекші кондитерлік кәсіпорындарының біріне жасалған бұл сапар партияның бағдарламалық бағыттарын тікелей түсіндіруге арналды. Партия өкілдері мен зауыт жұмысшылары әлеуметтік-экономикалық тұрақтылық, сапалы медициналық көмектің қолжетімділігі, шағын және орта кәсіпкерлікті жүйелі қолдау және жұмыс істейтін азаматтардың әл-ауқатын арттыру тақырыптарын ортаға салды.
«Ақ жол» партиясының ұстанымы айқын әрі бірізді: экономикалық өсім есептердегі құрғақ сандармен емес, азаматтардың нақты табысымен және өмір сүру сапасымен өлшенуі тиіс. Штаб мүшелері отандық кәсіпорындар ел тәуелсіздігінің басты тірегі екенін атап өтті, себебі нақты жұмыс орындарын ашып, бюджетке салық құятын және экономикалық дербестікті қамтамасыз ететін дәл осы өндіріс ошақтары.
Кездесу барысында отандық индустрияның дамуына кедергі келтіріп отырған факторларға ерекше назар аударылды. Партия өкілдерінің пікірінше, қымбат несие мөлшерлемелері, шектен тыс әкімшілік талаптар мен ережелердің жиі өзгеруі өндірістің тынысын тарылтпауы керек. Мемлекеттің басты міндеті – кәсіпорындардың күнделікті жұмысына араласу емес, адал бәсекелестікке, инвестиция тартуға және жаңа жұмыс орындарын ашуға қолайлы жағдай жасау.
Жиын еркін пікір алмасу форматында өтті. Фабрика қызметкерлері еңбек жағдайы, әлеуметтік кепілдіктер және саладағы өзекті мәселелерге қатысты сауалдарын қойып, өз ұсыныстарын білдірді. Штаб басшылығы ұжым көтерген әрбір мәселе жіті қаралып, партияның алдағы заң шығару қызметінде ескерілетінін жеткізді.
Кездесу соңында Дания Еспаева ұжымға адал еңбектері үшін алғыс білдіріп, зауыт жұмысшыларын ел өміріндегі маңызды саяси кезеңде белсенді азаматтық ұстаным танытуға шақырды.
