Қазақстанға сапарлап келуді жоспарлаған америкалық туристерге тек қарапайым қауіпсіздік шараларын сақтау ғана ұсынылады. Елімізге Мемлекеттік департаменттің ұсынымдар жүйесіндегі төрт деңгейдің ең қауіпсізі саналатын «1-деңгей» (Level 1) берілді.
Бұл санатқа, сондай-ақ, Канада, Жапония, Швейцария, Португалия, Польша, Румыния, Словакия және Словения сияқты мемлекеттер кіреді.
Салыстыру үшін айтсақ, 2-деңгей жоғары сақтық танытуды талап етсе, 3-деңгей сапардың қажеттілігін қайта қарауды, ал 4-деңгей саяхаттан мүлдем бас тартуды білдіреді. Мәселен, қазіргі таңда Ұлыбритания, Испания, Швеция және Түркия екінші деңгейге жатқызылған.
Дегенмен АҚШ Мемлекеттік департаменті бұл жіктеу халықаралық қауіпсіздік рейтингі емес екенін баса айтады. Бұл тек шетелге шығатын АҚШ азаматтары үшін ықтимал тәуекелдерді ескере отырып жасалған арнайы ұсыным ғана.
Осылайша, Қазақстан әлемдегі бірқатар танымал туристік бағыттармен қатар америкалық туристік ұсынымдардың ең қолайлы санатынан көрініп отыр.
