Қаладағы ірі компанияларға да осы шараға қосылу ұсынылды. Жұмыс берушілерге мүмкіндігінше қызметкерлерін уақытша қашықтан жұмыс істеуге ауыстыруға кеңес берілді.
Қашықтан жұмыс істеу мүмкіндігі жоқ ұйымдарға икемді кесте енгізу ұсынылады. Атап айтқанда, жұмыс күнін әртүрлі уақытта бастау қарбалас сағаттарда жолға шығатын автокөліктер санын азайтуға мүмкіндік береді.
Сонымен қатар Алматыда қоғамдық көлік жұмысы күшейтіледі. Қала бағыттарына қосымша 500 автобус шығарылады.
Метрополитен жұмысына да өзгеріс енгізіледі: пойыздар саны 11-ден 13-ке дейін көбейеді. Бұл жолаушылар ағыны артқан кезде метроның өткізу мүмкіндігін кеңейтуге тиіс.
Оқушыларды тасымалдауға тағы 300 автобус тартылады. Олар шамамен 13 мың оқушыға қызмет көрсетеді деп жоспарланып отыр.
Жолдардағы жүктемені азайту және қоғамдық көлік жұмысын күшейту шаралары қыркүйектің алғашқы екі аптасында қолданылады. Ал қала әкімдігінің қызметкерлері тек 1–5 қыркүйек аралығында қашықтан жұмыс істейді.
