Таныстырылымның басты жаңалығы — Apple тарихындағы алғашқы жиналмалы iPhone Duo. Бұл компания үшін айрықша оқиға болды. Тим Куктың орнына келген жаңа басшы Джон Тернус қызметіне кіріскеннен кейін небәрі екі аптадан соң жаңа құрылғыны көпшілікке таныстырды. Компания өкілдерінің айтуынша, бұл — iPhone дизайнына соңғы 20 жылға жуық уақыт ішінде енгізілген ең ауқымды өзгеріс.
iPhone Duo кітап тәрізді ашылып-жабылады және Apple тарихындағы ең үлкен iPhone саналады. Жиналған күйінде жалпақ смартфонға ұқсаса, ашылғанда шағын планшетке айналады. Ішкі экранының диагоналі — 7,6 дюйм, сыртқы экраны — 5,4 дюйм. Үлкен дисплейде екі қолданбаны қатар пайдалануға болады.
Apple өкілдері Duo дизайнына iPad үлгісі негіз болғанын айтады. Сонымен бірге компания құрылғының өзге жиналмалы смартфондарға ұқсамауына ерекше мән берген. Джон Тернустың сөзінше, бәсекелестердің көптеген үлгісі біріктірілген екі телефон сияқты көрінеді, сондықтан ашылғандағы экраны шын мәнінде үлкен болып сезілмейді.
Жиналмалы iPhone бірнеше жыл бойы әзірленген. Құрылғы титан жақтаумен және әрқайсысы 48 мегапиксель болатын екі негізгі камерамен жабдықталған.
iPhone Duo компания тарихындағы ең қымбат iPhone атанды. АҚШ-та оның бағасы 1999 доллардан басталып, нұсқасына қарай 3199 долларға дейін жетеді.
iPhone 18 Pro да бірқатар жаңартуға ие болды. Смартфонға жаңа процессор мен жетілдірілген салқындату жүйесі орнатылған. Камерадағы айнымалы диафрагма жарық мөлшерін және фонның бұлыңғырлану деңгейін реттеуге мүмкіндік береді. Үйлесімді қуаттау құрылғысын пайдаланғанда смартфонды шамамен 15 минутта 50 пайызға дейін қуаттауға болады.
Apple мәліметінше, iPhone 18 Pro Max құрылғысында бейнені 45 сағатқа дейін үздіксіз көруге мүмкіндік бар.
Siri де жаңарды. Жасанды интеллект негізіндегі көмекші енді қолданушымен еркінірек сөйлесіп, қолданбалардағы ақпаратты ескере алады және күнделікті істерді орындауға көмектеседі. Алайда жаңа мүмкіндіктердің қолжетімділігі тіл мен өңірге байланысты болады.
Компания дыбысы жаңартылып, шуды басу мүмкіндігі жақсартылған AirPods 5 құлаққабын да таныстырды. Ал жаңа Apple Watch Series 12 сағатына жүрек соғысын әр бес секунд сайын өлшейтін оптикалық сенсор орнатылған.
Астанадағы таныстырылым барысында iSpace қонақтарға арнайы сыйлықтар да ұсынды.
Жаңа құрылғыларға алдын ала тапсырыс беру 11 қыркүйекте басталады, ал сатылым 18 қыркүйекте ашылады. iPhone Duo-ның әлемдік сатылымы 23 қазанға жоспарланған.
Қазақстанда iPhone-ның жаңа үлгілерін Apple компаниясының премиум-серіктесі саналатын iSpace дүкендерінен сатып алуға болады.
