Қазақстанда отбасының материалдық жағдайын алдын ала бағалауға арналған жаңа сервис іске қосылды. eGov Mobile қосымшасындағы калькулятор табыс пен несиеден бөлек, жылжымайтын мүлік, автокөлік, кәсіпкерлік қызмет және мал басы туралы мәліметтерді де ескереді, деп хабарлайды SHYNDYK.KZ.
Еңбек және халықты әлеуметтік қорғау министрлігі 18 қазанда жаңа қызметтің іске қосылғанын хабарлады. Оны eGov Mobile қосымшасындағы «Сервистер» бөлімінен «Әл-ауқатты бағалау калькуляторы» арқылы табуға болады. Сервис отбасының қаржылық жағдайы мен әлеуметтік тұрақтылығын алдын ала бағалауға мүмкіндік береді.
Жаңа құрал әлеуметтік қолдау жүйесіндегі жоспарланған өзгерістер аясында енгізілді. 2027 жылғы 1 қаңтардан бастап әлеуметтік төлемдер мен қолдау шараларының 14 түрін тағайындау шарттарын қайта қарау көзделген. Қалған 22 түрі бойынша қолданыстағы талаптар сақталады. Дегенмен калькулятор жәрдемақы тағайындау немесе тоқтату туралы шешім қабылдамайды.
Калькулятор қандай мәліметтерді ескереді?
Алдымен отбасы мүшелерінің саны мен ай сайынғы табысы көрсетіледі. Оған жалақы, сыйақы, үстемеақы және басқа да төлемдер кіреді. Осы мәліметтер негізінде жан басына шаққандағы орташа табыс есептеледі. 2026 жылы Қазақстанда ең төменгі күнкөріс деңгейі 50 851 теңгені, ал кедейлік шегі 35 596 теңгені құрайды.
Сонымен қатар ипотека, автонесие, тұтынушылық қарыздар, бөліп төлеу, микрокредиттер мен кредиттік карталар бойынша міндеттемелер есепке алынады. Автокөлікті кепілге қойып алынған қарыздар да назардан тыс қалмайды. Мерзімі өткен берешекті бағалау кезінде 1 000 теңгеден асатын сомалар ескеріледі.
Калькулятор тұрғын үй, коммерциялық жылжымайтын мүлік, жер телімдері мен көлік құралдары туралы ақпаратты да қамтиды. Автокөліктің маркасы, моделі және шығарылған жылы, ал жылжымайтын мүліктің ауданы көрсетіледі.
Тіпті мал саны да есепке алынады
Сервисте ауыл шаруашылығы техникасы мен мал басына қатысты сұрақтар қарастырылған. Атап айтқанда, сиыр, жылқы, түйе, шошқа, қой және ешкі саны ескеріледі. Бұдан бөлек, отбасы мүшелерінің жеке кәсіпкер ретінде тіркелуі немесе заңды тұлғаларға қатысуы туралы мәліметтер сұралады.
Отбасының әлеуметтік жағдайына да мән беріледі. Еңбекке қабілетті адамдардың саны, асырауындағы отбасы мүшелері, мүгедектік, созылмалы аурулар және тұрақты күтімге мұқтаждық сияқты факторлар бағалауға әсер етеді.
Жәрдемақыдан бас тарту және банк шоттарын тексеру
Есептеу аяқталғаннан кейін пайдаланушыға алып отырған жәрдемақысынан мұқтаждығы жоғары отбасының пайдасына өз еркімен бас тартуға дайын екені туралы сұрақ қойылады. Оған «Иә, дайынмын» немесе «Жоқ» деп жауап беруге болады.
Сондай-ақ қосымша отбасының кәмелетке толған мүшелерінің соңғы 12 айдағы банк шоттары мен депозиттері бойынша операцияларды тексеруге келісім беруді ұсынады. Бұл қадам отбасының аса мұқтаж екенін растау және жәрдемақы алуды жалғастыру мәселесімен байланысты көрсетілген.
Маңыздысы: калькулятордың өзі банк операцияларын тексермейді және әлеуметтік төлемдерді тағайындау немесе тоқтату туралы шешім шығармайды. Ол отбасының әл-ауқатына алдын ала баға беруге арналған ақпараттық құрал.
