Президенттің айтуынша, сайлауалды науқан мазмұнды, ашық, бәсекелі әрі өркениетті жағдайда өтті. Саяси партиялар сайлаушылармен кездесулерде, бұқаралық ақпарат құралдарында, жалпыұлттық теледебаттар мен әлеуметтік желілердегі пікірталастар барысында өз бағдарламаларын кеңінен таныстырды.
Мемлекет басшысы азаматтардың партиялар ұсынған бағыттарды жан-жақты зерделеп, экономикадан мәдениетке дейінгі түрлі салаларды қамтитын бастамаларына баға беруге мүмкіндік алғанын айтты. Қоғамдық талқылауға жастар, кәсіби қауымдастық өкілдері мен кәсіпкерлер де белсенді қатысты. Президент мұны саяси мәдениеттің өскенінің көрінісі әрі елімізде жүргізілген реформалардың нақты нәтижесі деп бағалады.
Сайлауалды науқан отандық және халықаралық байқаушылардың жіті назарында болды. Олар дауыс беру күні де жұмысын жалғастырады. Қасым-Жомарт Тоқаев Қазақстан заң мен тәртіп үстемдік ететін, халық үні ескерілетін, саяси және қоғамдық институттары тиімді жұмыс істейтін мемлекет құрып жатқанын атап өтті.
Президент жалпыхалықтық дауыс беру қорытындысы бойынша Құрылтай құрамына білікті мамандар мен елжанды азаматтар сайланатынына сенім білдірді. Жаңа өкілді орган ел болашағына қатысты түрлі көзқарастар мен ортақ мақсаттар тоғысатын алаңға айналып, Қазақстанды жаңғырту ісіне тың серпін беруге тиіс.
Мемлекет басшысы алдағы жексенбіні ел тарихындағы бетбұрысты кезең әрі жаңа дәуірдің бастауы деп атады. Ол барша қазақстандықтарды, әсіресе жастарды сайлауға қатысып, мемлекеттің табысты дамуына өз үлесін қосуға шақырды. Сондай-ақ осындай тағдыршешті кезеңде әр азаматтың дауысы маңызды екенін атап өтті.
