Қазақстан Орталық сайлау комиссиясының сайтында Sailau AI жасанды интеллект ассистенті жұмыс істей бастады. Бұл сервис сайлау және сайлау процедураларына қатысты сұрақтарға тәулік бойы (24/7 режимінде) жауап береді.
Пайдаланушылар үйден дауыс беру тәртібі, сайлаушылар тізіміне ену, есептен шығару куәлігін алу және басқа да маңызды сұрақтар бойынша ақпарат ала алады.
Ассистент қазақ және орыс тілдерінде жұмыс істейді және AlemLLM тілдік моделінің негізінде жасалған. Оның жауаптары Қазақстанның Конституциясы, конституциялық заңдары және басқа да нормативтік актілері ескеріле отырып қалыптастырылады.
Sailau AI сондай-ақ Telegram желісінде де қолжетімді. Қазіргі уақытта әзірлеушілер жүйенің жауап беру дәлдігін арттыру үшін оны оқытуды жалғастыруда.
