Бұл мәселе әлеуметтік желіде де сөз бола бастады. Кейбір ата-аналар жәрдемақы алуға құқығы болса да, тұрмысы жақсы болғандықтан, мемлекеттен ақша алмауды жөн көрген.
Солардың бірі – көпбалалы әке Нұрлан Минайдаров. Ол табысы жеткілікті отбасылар балаларын өз қаражатына асырай алады деп есептейді. Оның пікірінше, жәрдемақыдан бас тарту – қоғам алдындағы жауапкершілікті сезінудің бір жолы.
Көпбалалы ана Зағипа Ахметқанова да жәрдемақы алмауға шешім қабылдаған. Айтуынша, қазір отбасының табысы күнделікті тұрмысқа жетеді. Дегенмен ол мемлекеттен көмек алатын ата-аналарды кінәламайды. Себебі кей отбасылар үшін жәрдемақының әр теңгесі маңызды.
Қазақстанда көпбалалы отбасыларға арналған мемлекеттік жәрдемақы табыс мөлшеріне қарамастан төленеді. Яғни тұрмысы жақсы отбасылар да бұл ақшаны алуға құқылы.
Ата-аналардың мұндай шешімі әлеуметтік желіде мемлекет қаржысы кімдерге берілуі керек деген сауал туғызды. Дегенмен бір отбасы жәрдемақыдан бас тартса, оның ақшасы басқа мұқтаж жанға бірден аударылмайды.
Қалай болғанда да, жәрдемақыны алу-алмауды әр отбасы өзі шешеді. Ал мемлекет заң жүзінде беріп отырған көмекті пайдаланғаны үшін ата-аналарды жазғыруға негіз жоқ.
