Тек 2025 жылдың өзінде салаға 1,25 трлн теңге инвестиция тартылды. Бұл алдыңғы жылмен салыстырғанда 32,6%-ға көп. Қазір жалпы құны шамамен 1,3 трлн теңге болатын 328 жоба жүзеге асырылып жатыр. Жобалар іске қосылғаннан кейін 10 мыңға жуық тұрақты жұмыс орны ашылып, халықаралық деңгейдегі 25 қонақүй кешені пайдалануға беріледі.
2025 жылы Қазақстанға 15,7 млн шетел азаматы келген. Оның 11,1 миллионы турист ретінде есепке алынды. Шетелдік қонақтар ел ішінде 2,9 млрд доллар жұмсаған. Оқиғалық туризмді дамыту үшін 2026 жылға 55 ірі іс-шарадан тұратын күнтізбе әзірленді.
Екі жылда ішкі туристер саны 7,1 млн-нан 8,7 млн адамға дейін өсті. Сонымен қатар орналастыру орындарының саны артты: 2023 жылы олардың саны 3 992 болса, 2025 жылы 4 482-ге жетті. Ал 2026 жылғы 1 сәуірдегі көрсеткіш 4,5 мыңнан асты.
Биыл жол жөндеу жұмыстары 11 мың шақырым автожолды қамтыды. Олардың қатарында Рахман қайнары, Кендірлі, Баянауыл, Зеренді және Көлсайға апаратын жолдар бар.
Катонқарағай, Зайсан және Кендірліде әуежай құрылысы жалғасып жатыр. Жазғы маусымда аптасына 45 субсидияланатын әуе рейсі ұйымдастырылды.
Алматы тау кластерін жылына 5 млн турист қабылдайтындай деңгейге жеткізу жоспарланған. Жоба тау шаңғысы аймақтарын біріктіруді, 30 аспалы жол салуды және жалпы ұзындығы 161 шақырым болатын шаңғы жолдарын жабдықтауды көздейді. Сонымен бірге Маңғыстау және Щучье-Бурабай курорттық аймақтарын дамыту жоспарлары жүзеге асырылуда.
2025 жылы Қазақстанның ұлттық парктеріне 3,7 млн адам барған. Ерекше қорғалатын табиғи аумақтарда 179 туристік бағыт пен 42 экологиялық соқпақ жұмыс істейді. 2026 жылдан бастап 18 жасқа толмаған балалар мемлекеттік ұлттық табиғи парктерге тегін кіре алады.
