Депутат Екатерина Смышляева қолданыстағы туу туралы куәліктің баланы нақты сәйкестендіруге мүмкіндік бермейтінін айтты. Оның сөзінше, құжатта баланың жеке деректері көрсетілгенімен, куәліктің дәл сол балаға тиесілі екенін тексеру қиын.
Депутаттың пікірінше, құжатқа фотосурет енгізу балалардың қауіпсіздігін күшейтіп, оларды ауыстырып жіберу және заңсыз сату қаупін азайтуға көмектеседі.
Құрылтай отырысынан кейін өткен брифингте мемлекеттік органдардың өкілдері туу туралы куәлікке баланың фотосуретін енгізу басым бағыттардың бірі ретінде қарастырылып жатқанын түсіндірді.
Қазір Әділет министрлігімен бірлесіп, өзге мемлекеттердің тәжірибесі зерделенуде. Әртүрлі елде балаларды фотосурет арқылы сәйкестендіру белгілі бір жастан басталады. Сондықтан Қазақстанда бұл талапты қай жастан енгізу керектігі әлі талқыланып жатыр.
Жаңа тетікті әзірлеу кезінде балалардың жеке және биометриялық деректерін қорғау мәселесіне ерекше назар аударылмақ. Атап айтқанда, олардың мәліметтерін заңсыз пайдалану мен таратудың алдын алатын қауіпсіздік шаралары қарастырылады.
«Қазақстан балалары» тұжырымдамасына сәйкес, бұл мәселені 2027 жылдың шілдесіне дейін пысықтау жоспарланған.
Әзірге фотосурет қай жастан бастап талап етілетіні, оны қаншалықты жиі жаңарту қажеттігі және құжаттың қандай форматта болатыны белгісіз.
Яғни туу туралы куәлікке фотосурет енгізу жөнінде түпкілікті шешім қабылданған жоқ. Қазіргі уақытта бұл бастама талқылау және зерделеу кезеңінде.










