SHYNDYK.KZ дереккөздерінің хабарлауынша, қайғылы оқиға екі адам арасындағы жанжал емес, алдын ала жоспарланған топтық шабуылдың салдары болуы мүмкін. Студенттер тобы бірінші курс студентінен ақша бопсалаған деген болжам бар, сондай-ақ жас жігітті ұрып-соғу кезінде тек қолмен ғана емес, электрошокер де қолданылған-мыс.
Редакцияға келіп түскен тағы бір нұсқа бойынша, бұған дейін ұсталған жалғыз күдікті басқа жеті қатысушыны қылмыстық жауапкершіліктен құтқару үшін барлық кінәні өз мойнына алған болуы мүмкін.
Осы орайда студенттік кампус аумағындағы қауіпсіздікке қатысты көптеген маңызды сұрақтар туындайды: студенттердің қолына арнайы құрал қайдан түскен, жатақханадағы бейнебақылау камералары жұмыс істей ме және білім алушылардың өмірі мен тәртібіне кім тікелей жауапты?
Еске сала кетейік, бұған дейін Алматы полициясы қозғалған қылмыстық іс аясында тек бір күдіктінің ұсталғанын растаған болатын. Барлық мән-жайды анықтау, сондай-ақ топтық бопсалау нұсқасын және басқа да ықтимал фигуранттардың рөлін тексеру мақсатында SHYNDYK.KZ редакциясы қалалық Полиция департаментіне қайтадан ресми сауалнама жолдады.










