Су басқан аймақтардан тараған көптеген видеоның ішінде мүгедектер арбасындағы егде жастағы әйелдің көрінісі желі қолданушыларының назарын аударды. Көшені су алғанына қарамастан, ол су кешіп, өз бетінше ілгері жылжып барады.
Ал басқа кадрларда табиғи апаттың салдары әлдеқайда қорқынышты көрінеді. Лай судың көтерілгені сонша, кейбір жерлерде ғимарат терезелерінің ортасына дейін жеткен. Жолдар су астында қалып, үйреншікті қала көрінісі арнасынан асқан өзенді елестетеді.
Ауа райының бұлай күрт бұзылуына Қытайдың шығыс жағалауына соққан «Дельфин» тайфуны себеп болды. Сұрапыл жел толассыз нөсермен ұласып, соның салдарынан су деңгейі тез көтерілген.
Әсіресе Чжэцзян провинциясы мен Шанхай маңында жағдай өте күрделі. Кейін нөсер жауын ел ішіне қарай ойысқан. Қолайсыз ауа райының зардабын орталық аймақтар да тартып отыр, тіпті Пекиннің кейбір аудандарында да қатты жауын жауды.
Қауіпті аймақтардан бір миллионнан астам адам эвакуацияланды. Билік тұрғындарды қауіпсіз жерлерге күні бұрын көшірген, өйткені тек су тасқыны ғана емес, сонымен бірге көшкін жүру және жаңа тасқындардың қайталану қаупі де төніп тұрды.
Апат көлик қатынасына да айтарлықтай кедергі келтірді. Әуе рейстері тоқтатылып, пойыз бен автокөлік қозғалысында іркіліс пайда болды. Кейбір аумақтарда су деңгейінің тым биіктігінен көліктер мен қоғамдық транспорт жартылай су астында қалған.
Тайфунның беті қайтқанымен, жағдай бірден реттеле қойған жоқ. Ол өзімен бірге әкелген ылғалды ауа массасы елдің басқа бөліктерінде де қатты жауын-шашын тудыруды жалғастырды. Кейбір аудандарда бір тәулікте түскен жауын-шашын мөлшері рекордтық көрсеткішке жетті.
Қазір Қытайдағы жағдай түсірілген кадрлар әлеуметтік желілерде кеңінен таралып жатыр. Олардың бірі су астында қалған үйлер мен көліктерді көрсетіп, табиғи апаттың нақты ауқымын ұқтырса, енді бірі адам тағдырымен есте қалады. Мұндай қиын жағдайдың өзінде су басқан аймақтан өз күшімен шығуға тырысқан егде жастағы әйелдің видеосы — соның айқын дәлелі.
