Моңғолияда ірі жемқорлық дауы өршіп тұр. Оппозиция өкілдері мемлекет қаржыландыратын теміржол жобасы аясында заңсыз төлемдер жасалуы мүмкін екенін айтып, жоғары лауазымды шенеуніктердің, соның ішінде мемлекет басшысының ықтимал қатысын тексеруді талап етті.
Таратылған ақпаратқа сәйкес, президент Ухнаагийн Хурэлсух тергеу органдарымен ынтымақтасуға дайын екенін білдірген. Алайда оған тағылған айыптардың дәлелденгені туралы ресми мәлімет жоқ.
Жемқорлыққа қатысты күдік Таван-Толгой — Гашуунсухайт теміржолының құрылысына байланысты. Бұл жоба Моңғолияның көмір экспортын дамытуда маңызды рөл атқарады. Оппозиция өкілдері жоба аясындағы қаржылық операциялардың ашықтығына күмән келтіріп отыр.
Бұған дейін, 9 қарашада Моңғолияның сыбайлас жемқорлыққа қарсы органы президенттің табысы мен мүлкі туралы декларацияларын тексеру барысында заңбұзушылық анықталмағанын хабарлаған. Дегенмен теміржол жобасына қатысты ықтимал заңсыз төлемдер жөніндегі мәліметтерді тексеру жалғасып жатқаны айтылды.
Президенттің нақты қашан қызметінен кететіні әзірге белгісіз. Моңғолия заңнамасына сәйкес, мемлекет басшысының өкілеттігін мерзімінен бұрын тоқтату мәселесі парламенттің — Ұлы мемлекеттік хуралдың қарауына жатады.
Айта кетейік, 2026 жылдың сәуірінде Ухнаагийн Хурэлсух Қазақстанға мемлекеттік сапармен келген болатын. Астанада ол Қазақстан президенті Қасым-Жомарт Тоқаевпен келіссөз жүргізіп, екі ел арасындағы сауда-экономикалық байланыстарды, энергетика және өзге де салалардағы ынтымақтастықты дамыту мәселелерін талқылаған.










