Джон ван ’т Схип жаттықтыратын Қазақстан құрамасы Ұлттар лигасындағы соңғы кездесулерде жеңіске жете алмады. Команданың сәтсіз ойынынан кейін жанкүйерлер тарапынан сын күшейіп, ҚФФ бас хатшысы Скотт Манн бейнеүндеу жасады.
«Соңғы нәтиже біз үшін мүлде қолайсыз. Жанкүйерлердің көңілі қалғанын және олардың наразылықтарын толықтай түсінеміз», – деді Манн.
Ол ұлттық құрамаға қатысты қабылданған шешімдерге федерация жауапты екенін атап өтті. Сондай-ақ сәтсіздіктің бар кінәсін футболшылар мен жаттықтырушыларға арта салмайтынын жеткізді.
Қазіргі ойын кезеңі аяқталған соң федерация құраманың жұмысын жан-жақты саралайды. Футболшылардың дайындығы, құрамды жасақтау, жаттығу барысы, бапкерлер штабының шешімдері мен матч нәтижелері тексеріледі.
Өзгерістер тек ұлттық құрамамен шектелмеуі мүмкін. Федерация 15 жасқа дейінгі жасөспірімдер құрамасынан бастап бас командаға дейінгі футболшыларды даярлау жүйесін қайта қарауды жоспарлап отыр. Техникалық орталық пен ұлттық құрамалар департаментінің жұмысы да бағаланады.
«Талдау қорытындысы бойынша нақты шешімдер қабылданады. Алға жылжу үшін қажет болса, түбегейлі өзгерістерге де барамыз», – деді ҚФФ бас хатшысы.
Әзірге Джон ван ’т Схиптің бас жаттықтырушы қызметінде қалатыны белгісіз. Федерация түпкілікті шешімді құраманың қазіргі ойын кезеңі аяқталғаннан кейін қабылдайды.
ҚФФ ұлттық құраманың басты мақсаты өзгермегенін мәлімдеді. Ол – Қазақстанды Еуропа чемпионатына шығару.
