Қазақстан Президенті Қасым-Жомарт Тоқаев қазан айында Қазақстан халқына Жолдау жасайтынын мәлімдеді. Мемлекет басшысының айтуынша, онда елдің алдағы кезеңдегі негізгі мақсаттары мен міндеттері айқындалады.
Президент бұл туралы өз сөзінде айтып, Жолдау Қазақстан Конституциясының 46-бабына сәйкес жарияланатынын атап өтті.
Мемлекет басшысы елде жүргізіліп жатқан ауқымды реформалар мен мемлекеттік институттарды жаңғырту жұмыстарына да тоқталды. Оның айтуынша, қабылданған Конституция халық үшін бағдарға айналып, одан әрі өзгерістерді жүзеге асыруға негіз қалады.
«Ортақ күш-жігерімізді біріктіре отырып, ауқымды реформаларды табысты жүзеге асырып келеміз. Бүкіл халыққа, әсіресе өскелең ұрпаққа бағдар болған Конституцияны қабылдадық. Әділетті, қуатты, өркендеген және таза Қазақстанды құрудың берік негізі қаланды», – деді Президент.
Мемлекет басшысы жақында Құрылтайға сайлау өткенін, депутаттар қатарын кәсіби мамандар мен жастар толықтырғанын айтты. Сондай-ақ Вице-Президент тағайындалып, Үкіметтің жаңартылған құрамы жұмысын бастады, Қауіпсіздік Кеңесінің Аппараты қайта жасақталды.
Бұдан бөлек, алдағы уақытта Қазақстан Халық Кеңесінің құрамы бекітіледі. Құрылтай депутаттарымен келісу арқылы Конституциялық соттың судьяларын, Орталық сайлау комиссиясы мен Жоғары аудиторлық палатаның мүшелерін тағайындау жоспарланып отыр.
«Осылайша, негізгі мемлекеттік институттар толық жаңартылады. Бұл шаралар жүргізіліп жатқан кешенді реформалардың ажырамас бөлігі болып саналады», – деді Қасым-Жомарт Тоқаев.
Мемлекет басшысы осы өзгерістер аясында қазан айындағы Жолдауда Қазақстанның одан әрі даму бағыттары айқындалатынын атап өтті.
