Қызылорда облысында бағалы металдарды заңсыз өндіру ісі тергеліп жатыр.
Тергеу мәліметтеріне сүйенсек, қылмыстық топ Шиелі ауданындағы Жаманкөл шатқалында жұмыс істеп, саф алтын өндірген.
Қаржылық мониторинг агенттігінің хабарлауынша, бұл заңсыз схема жоғары деңгейде ұйымдастырылған. Әр қатысушының өз міндеті болды. Біреулері жұмысқа адамдар тауып, тікелей қазу жұмыстарымен айналысса, екіншілері алтынды тасымалдап, сатып алушыларды іздеген. Ал кейбір қатысушылар қауіпсіздікке жауап берген.
Бөтен адамдар қазып жатқан жерге байқатпай келіп қалмауы үшін, аумақ шетіне бақылаушылар қойылған. Сондай-ақ маңайды мотоциклмен аралап, күзетіп жүрген. Олардың басты міндеті — бейтаныс адамдарды немесе мемлекеттік орган қызметкерлерін дер кезінде байқап, қалғандарына ескерту беру болған.
Жаманкөлде алтын өндіру айтарлықтай оңай еді: мұндағы металл күрделі өнеркәсіптік өңдеуді қажет етпейтін саф алтын болатын.
Тінту барысында күштік құрылым өкілдері құрамында алтыны бар 500 грамнан астам шикізат тапты. Сонымен қатар, екі арнайы техника, 12 металл іздегіш және алты автокөлік тәркіленді. Бұдан бөлек, екі пневматикалық тапанша мен тегіс ұңғылы мылтық табылған.
Тергеушілердің пайымдауынша, өндірілген алтын Алматыға жеткізіліп, сол жақта сатылған. Түскен қаражатты топ мүшелері өзара бөлісіп отырған.
Ұстау операциясын прокуратураның үйлестіруімен Қызылорда облысы бойынша ҚМА департаменті мен ҰҚКД қызметкерлері бірлесіп жүргізді.
Қазіргі уақытта 13 адам қамауға алынды. Тергеу амалдары жалғасуда.
Бұл туралы SHYNDYK.KZ хабарлайды. Ең өзекті және маңызды жаңалықтарды біздің сайттан оқи аласыздар.
