Қаржылық мониторинг агенттігі әлеуметтік желілерде «Маха.dxb» лақап атымен танымал Өзбекстан азаматы Махмұд Хикматовқа халықаралық іздеу жариялады. Сот оны қамауға алу түріндегі бұлтартпау шарасына санкция берді.
Тергеу нұсқасы бойынша, Хикматов қазақстандық аудитория арасында заңсыз интернет-казиноларды ілгерілету схемасына қатысушылардың бірі болған. Бұл тізімде SultanGames, PINCO, Nomadcasino, Pin-Up, Vavada және басқа да алаңдар бар.
ҚМА мәліметінше, оның басты міндеті – Қазақстанда оқырманы көп блогерлерді тауып, олармен жарнама орналастыру туралы келісімге келу болған. Инфлюенсерлермен ынтымақтастық орнатпас бұрын олардан парақша статистикасын, атап айтқанда оқырмандар саны мен географиясын, аудитория жасы мен қаралымды сұратып отырған. Жарнама құны осы көрсеткіштерге тікелей байланысты болды.
Тергеу деректеріне сүйенсек, осылайша құмар ойындар алаңдарын жарнамалауға 35-тен астам блогер тартылған.
Олардың қатарында Қайсар Қамза да бар. Бұған дейін оған да халықаралық іздеу жарияланған еді. Блогер Вьетнамда ұсталып, 6 тамызда Қазақстанға экстрадицияланды. Тергеушілердің пікірінше, ол өз парақшалары мен жабық арналары арқылы тыйым салынған құмар ойындарды жарнамалап, сілтемелер қалдырған және сол арқылы тартылған қолданушылар үшін ақша алып отырған.
Хикматовтың өзі тек блогер ретінде ғана танымал емес. Ол поп-ММА турнирлеріне қатысқан, сондай-ақ бірнеше жыл бұрын 30 млн теңгеге өз денесіне жарнамалық татуировка жасатуға дайын екенін мәлімдеп, жұрттың назарын аударған болатын.
Қазіргі уақытта «Маха.dxb»-ның қайда екені анықталуда. ҚМА оның орналасқан жері туралы ақпарат білетін адамдардан хабар беруді сұрайды. Ақпарат бергендерге сыйақы уәде етілген және олардың құпиялығына толық кепілдік беріледі.
Тергеу амалдары жалғасуда. Күдіктілердің іс-әрекетіне түпкілікті құқықтық бағаны сот береді.
Бұл туралы SHYNDYK.KZ хабарлайды. Ең өзекті және маңызды жаңалықтарды біздің сайттан оқи аласыздар.
