Шерхан Аймахан Ақташтағы Республикалық психиатриялық ауруханада жатқан кезінде қызметкерлер оған қоқан-лоқы көрсетіп, «бұл жерден өлігің шығуы мүмкін» деп қорқытқанын алға тартты.
SHYNDYK.KZ хабарлағандай, сотталушының сөзінше, ол тергеу изоляторында да түрлі қысымға ұшыраған. Аймахан өзіне азаматтық киімдегі белгісіз адамдар келіп, оқиғаның мән-жайын айтып беруді талап еткенін мәлімдеді. Алайда ол сол күнгі жағдайдың біраз бөлігі есінде жоқ екенін айтып отыр.
Дегенмен, сарапшылардың қорытындысы оның сөзімен сәйкес келмейді. Сараптама нәтижесіне сүйенсек, шабуыл жасаған сәтте Аймахан өз әрекетінің сипаты мен қаупін толық ұғынған және ешқандай аффект күйінде болмаған. Сотталушы бұл қорытындымен мүлдем келіспейтінін жеткізді.
Тергеу мәліметтеріне қарағанда, қайғылы оқиға 11 қаңтарда болған. Бойжеткен онымен қарым-қатынасын жалғастырудан және тұрмысқа шығудан бас тартқаннан кейін, Аймахан оны үйінің маңында аңдып күтіп тұрған.
Тергеушілердің пайымдауынша, жас жігіт қызға тап беріп, оны пышақпен 35 рет жарақаттаған. Алған ауыр жарақаттарының салдарынан Нұрай Серікбай көз жұмды.
Осы сұмдық оқиғадан кейін күдіктіге іздеу жарияланып, екі тәуліктен соң ол Шымкент қаласының маңында қолға түсті.
Қазіргі уақытта іс сотта қаралып жатыр. Аймаханның өзіне қысым жасалғаны туралы мәлімдемесі оның жеке ұстанымы саналады және арнайы тексеруді қажет етеді.
