Қазақстанда әйелдерді тұрмыстық зорлық-зомбылықтан қорғаудың жаңа тетігі ұсынылды. Құрылтай депутаты, «Әділет» фракциясының өкілі Айжан Аймағанова ішкі істер министрі Ержан Сәденовке тиісті ұсыныстар жолдады.
Бұған Абай облысында 20 жастағы Ділназ Жұмағұлованың өлтірілуі және Астанада Жазира Адауованың қаза табуы себеп болған. Депутаттың пікірінше, тұрмыстық зорлық-зомбылық үшін жаза күшейтіліп, әйелдер мен балаларды қорғау шаралары кеңейтілгенімен, мұндай қайғылы оқиғалар әлі де тіркеліп жатыр.
Аймағанова осыған байланысты еліміздің бірнеше өңірінде «Электронды қорғау аймағы» пилоттық жобасын іске қосуды ұсынды. Жоба аясында профилактикалық есепке алу және электронды бақылау тетіктерін пайдалану көзделген. Негізгі мақсат – зорлық-зомбылық қаупін ерте анықтап, қылмыстың алдын алу.
Сонымен қатар депутат полицияға түскен қорқыту және қоқан-лоқы туралы хабарламаларға әрекет етудің бірыңғай тәртібін әзірлеу қажет деп есептейді. Әрбір өтініш пен оған байланысты қабылданған шаралар цифрлық жүйеде автоматты түрде тіркелуі тиіс.
Аймағанованың айтуынша, мұндай қылмыстардың алдын алуға қажетті құқықтық және цифрлық құралдар қазірдің өзінде бар. Әзірге бұл депутаттық бастама деңгейінде қалып отыр. Пилоттық жобаның қашан және қай өңірлерде іске қосылатыны туралы шешім жарияланған жоқ.
