Алға ауданының тұрғыны Арыстанбек Бахилин жоғалған бұқаларға байланысты даудан кейін соққыға жығылғанын айтып, 14 шілдеде полицияға арыз берген.
Бахилиннің айтуынша, мал жайып жүрген кезде бірнеше бұқа табыннан бөлініп, «Өтеғұл-1» шаруа қожалығының малына қосылып кеткен. Кейін ол малын алып қайту үшін танысымен бірге қожалыққа барған. Қасындағы адам одан кейінгі жағдайды көргенін айтады.
Редакцияға жолдаған бейнеүндеуінде малшы бұқаларды қайтару үшін өзінен 20 мың теңге сұралғанын мәлімдеді. Оның сөзінше, кейін қожалық басшысы Өтеген Жақыпов пен оның ұлы оны жерге жығып, ұрып-соққан.
Бахилин өзімен бірге барған танысының оқиғаны көргенін алға тартады. Сондай-ақ ол бес баланы тәрбиелеп отырғанын, жалдамалы үйде тұратынын және ауылдың малын бағумен күн көретінін айтты.
Редакцияға арыз бен сот-медициналық сараптама қорытындысының көшірмелері ұсынылды. Арыз 14 шілдеде тіркелген. Келесі күні материалдар зерттеуге жіберіліп, сараптама қорытындысы 17 шілдеде дайындалған.
Құжатта Бахилиннің ішінің сол жақ тұсынан сызық тәрізді екі қанталау анықталғаны жазылған. Сарапшы бұл жарақаттардың ер адам көрсеткен уақытта қатты доғал заттың әсерінен пайда болуы мүмкін екенін көрсеткен.
Алайда жарақаттар денсаулықтың қысқа мерзімге бұзылуына әкелмеген. Сол себепті олар денсаулыққа зиян келтірмеген дене жарақаттары санатына жатқызылған.
Сараптама Бахилиннің денесінде жарақат болғанын растайды. Дегенмен құжатта оны кімнің салғаны анықталмаған.
Редакция полициядан алғашқы жауап алудан кейін Бахилиннің неге қайта шақырылмағанын сұрады. Ақтөбе облысының Полиция департаменті әзірге бұған қажеттілік жоқ екенін жеткізді.
«Сараптама тағайындалса, оның қорытындысын күту керек. Адамды қайта-қайта шақырып, мазалаудың не қажеті бар? Бір рет жауап алынды, оны күн сайын шақырмайды», – деп түсіндірді полиция өкілдері.
Сонымен бірге 17 шілдеде дайындалған сот-медициналық сараптама қорытындысы арыз иесінің қолында бар. Полиция нақты қай зерттеудің нәтижесін күтіп отырғанын және қосымша сараптама тағайындалған-тағайындалмағанын нақтыламады.
Редакцияның ресми сауалына берген жауабында Полиция департаменті тергеу жалғасып жатқанын хабарлады.
«Аталған дерек бойынша сотқа дейінгі тергеу жүргізіліп жатыр. Полиция қызметкерлері оқиғаның барлық мән-жайын анықтауда. Тергеу аясында қажетті тергеу және процессуалдық іс-шаралар атқарылып жатыр. Оның қорытындысы бойынша қолданыстағы заңнамаға сәйкес процессуалдық шешім қабылданады», – делінген ресми жауапта.
Полиция істің қай бап бойынша тергеліп жатқанын және оған қатысушылардың процессуалдық мәртебесін атаған жоқ.
Ашық деректерге сәйкес, Өтеген Жақыпов – филология ғылымдарының кандидаты, доцент. Ол қазақ әдебиетін, соның ішінде ақын Қуандық Шаңғытбаевтың шығармашылығын зерттеген. Сондай-ақ Алға ауданындағы «Өтеғұл-1» шаруа қожалығын басқарады.
SHYNDYK.KZ редакциясы Өтеген Жақыповпен хабарласып, материалда екі тараптың да ұстанымы берілуі үшін оқиғаға қатысты пікірін сұрады. Алайда ол «Рахмет» деп қысқа жауап беріп, басқа түсініктеме ұсынбады.
Оқиғаға түпкілікті құқықтық бағаны тергеу органдары береді. Сот үкімі заңды күшіне енгенге дейін арызда аты аталған адамдар кінәсіз деп есептеледі.
