Жүргізушілер ақауларды жанармаймен байланыстырады. Олардың сөзінше, көліктегі мәселе жанармай құю станциясына барғаннан кейін көп ұзамай басталған. Алайда бензин сапасы мен автокөліктердегі ақау арасында тікелей байланыс бар екені әзірге ресми түрде дәлелденген жоқ.
Энергетика министрі Ерлан Ақкенженов түскен ақпаратты тексеру үшін Павлодарға энергетика вице-министрі Қайырхан Тұтқышбаев пен Техникалық реттеу және метрология комитетінің өкілдері жіберілгенін мәлімдеді. Мамандарға Павлодар мұнай-химия зауытын тексеріп, жанармай сынамаларын алу тапсырылды.
Министрлік мәселенің қай кезеңде туындауы мүмкін екенін анықтамақ. Ақау бензинді мұнай өңдеу зауытында өндіру кезінде де, оны жанармай құю станцияларында сақтау немесе сату барысында да пайда болуы ықтимал. Түпкілікті қорытынды тексеру аяқталғаннан кейін жасалады.
Ал Павлодар мұнай-химия зауыты арбитраждық сынамаларды зерттеу кезінде талаптан ауытқу анықталмағанын хабарлады. АИ-95 және АИ-98 бензинінің үлгілері 25 тамызда SGS Kazakhstan тәуелсіз зертханасында тексерілген. Кәсіпорын мәліметінше, зерттелген жанармай Кеден одағының техникалық регламенті мен ГОСТ талаптарына сай келеді.
Арбитраждық сынамалар жөнелтілетін жанармай партияларынан алынып, мөрленеді және өнім сапасына қатысты дау туындаған жағдайда тексеру үшін сақталады. Дегенмен нақты сынамалардың талапқа сай болуы жүргізушілерден түскен барлық шағымның себебін түсіндірмейді. Энергетика министрлігі жүргізіп жатқан тексерудің қорытындысы әлі жарияланған жоқ.
Ерлан Ақкенженов Атырау мұнай өңдеу зауытынан бензиннің жаңа партиясы тарату желісіне жөнелтілгенін де айтты. Жанармай алдағы 10–12 күн ішінде жеткізіледі деп күтіліп отыр.
Мамандар жағдайдың себебін анықтап жатқанда, жанармай құйғаннан кейін бірден көлігі сыр берген жүргізушілер барлық мән-жайды дұрыс тіркеп қоюы қажет. Ең алдымен ЖҚС-тан берілген қағаз немесе электронды чекті сақтау керек. Чек болмаған жағдайда жанармай сатып алғаныңызды банк көшірмесі, мобильді қосымшадағы төлем тарихы немесе транзакция туралы мәлімет арқылы растауға болады.
Жанармай құю станциясының нақты мекенжайын, сатып алған күн мен уақытты, колонка нөмірін, жанармай маркасы мен көлемін жазып алған жөн. Сондай-ақ аспаптар тақтасындағы ескерту белгілерін суретке түсіріп, көліктің жүріс көрсеткішін және қозғалтқыштың бірқалыпсыз жұмысын видеоға тіркеген дұрыс.
Егер автокөлік қуатын жоғалтып, қозғалтқыш іркіліспен жұмыс істесе немесе аспаптар тақтасында ескерту шамдары жанса, диагностикадан өтпей жолды жалғастыру ұсынылмайды. Көлікті сервис орталығына жеткізген жөн. Оны әрі қарай жүргізу ақауды ушықтыруы мүмкін болса, эвакуатор шақыру қажет.
Сервис орталығынан көлік иесінің шағымы, диагностика нәтижелері, анықталған қателер мен жүргізілген жұмыстар көрсетілген жазбаша құжаттарды сұрату керек. Тапсырыс-нарядты, маманның қорытындысын, жөндеу мен эвакуатор қызметінің чектерін, сондай-ақ ауыстырылған бөлшектерге қатысты құжаттарды сақтау маңызды.
Егер мамандар бактағы бензинді төгу туралы шешім қабылдаса, бұл рәсімді алдын ала құжатпен бекітуді талап еткен жөн. Жанармай сынамасы таза ыдысқа алынып, мөрленуге тиіс. Сынама алынған күн, орын және оған қатысқан адамдар көрсетілген акт жасалуы керек. Өз бетінше алынған әрі тиісті түрде рәсімделмеген үлгі талапты дәлелдеуге жеткіліксіз болуы мүмкін.
Диагностика қорытындысын алғаннан кейін жүргізуші жанармай құю станциясының иесіне жазбаша талап жолдай алады. Құжатта жанармай құю жағдайын, пайда болған ақауларды және жұмсалған шығындарды көрсету қажет. Растайтын құжаттардың көшірмелері де қоса беріледі.
Егер автокөлікке келген зиян сапасыз жанармайдан болғаны дәлелденсе, тұтынушы жанармай құнын қайтаруды және келтірілген шығындарды өтеуді талап етуге құқылы. Сондықтан диагностика қорытындысы, зертханалық зерттеу нәтижелері және жанармай құю мен ақау арасындағы байланысты растайтын өзге құжаттар шешуші мәнге ие болады.
Жазбаша талапты компания өкіліне жеке тапсыруға, жеткізілгені туралы хабарламасы бар тапсырысты хатпен жіберуге немесе сатушының ресми электронды мекенжайына жолдауға болады. Компания қойылған талаппен келіспесе, 10 күнтізбелік күн ішінде уәжді жазбаша жауап беруге тиіс.
Жауап берілмеген немесе дәлелденген шығынды ерікті түрде өтеуден бас тартылған жағдайда көлік иесі аумақтық Сауда және тұтынушылардың құқықтарын қорғау департаментіне жүгіне алады. Сондай-ақ мемлекеттік ақпараттық жүйелер арқылы өтініш беруге немесе өз мүддесін сотта қорғауға болады. Жанармай сапасын тікелей тексеру үшін Техникалық реттеу және метрология комитетінің аумақтық бөлімшесіне де өтініш беруге мүмкіндік бар.
Ресми тексеру қорытындысы шыққанға дейін ақауға нақты бір жанармай партиясы, мұнай өңдеу зауыты немесе белгілі бір ЖҚС желісі себеп болды деп айтуға ерте. Дегенмен мәселеге тап болған жүргізушілер диагностиканы кейінге қалдырмай, мүмкіндігінше барлық дәлелді сақтауы қажет.
