Қайғылы оқиға 26 ақпанда болды. Жарылыс пен одан кейін шыққан өрттен 12 адам қаза тауып, тағы 16 адам жарақат алды.
Айыптау нұсқасына сәйкес, оқиғадан бір күн бұрын Виктор Домбровский тұрмыстық екі газ баллонын автогаз құю станциясына апарған. Сол жерде оларға сұйытылған газ құйылған. Келесі күні ол баллондарды кафеге жеткізген.
Баллондардың бірі асүй маңындағы дәлізге, жылу радиаторының жанына қойылған. Кешке баллон жарылып, газ-ауа қоспасы тұтанған да, өрт басталған.
Сотта прокурор техникалық және жарылыс-техникалық сараптамалардың қорытындысына сүйенді. Жарияланған тұжырымдарға сәйкес, сыртқы орта жағдайының өзгеруі және баллонға газдың шамадан тыс құйылуы оның қабырғасының бұзылуына себеп болуы мүмкін. Сарапшылар газ плитасының ашық жалынын ықтимал тұтану көзі ретінде атаған.
Виктор Домбровскийге Қазақстан Қылмыстық кодексінің 306-бабының 3-бөлігі бойынша айып тағылған. Алайда оның қызы әкесі тек баллондарды тасымалдағанын және кафедегі газ жабдығын пайдалануға жауап бермегенін алға тартады.
«Әкем «Палау орталығы» кафесінің қызметкері болған жоқ, оның штатында жұмыс істемеді және мекемедегі газ жабдығын пайдалануға жауап бермеді. Оны тек тұрмыстық газ баллондарын жеткізу үшін шақырған», – деді Кристина Викторовна.
Оның айтуынша, Домбровский әр баллонды жеткізгені үшін мың теңге алған. Ол кафемен шамамен 2025 жылдың жазында жұмыс істей бастаған, кейін үзіліс жасап, 2026 жылдың қаңтарында баллон жеткізуді қайта жалғастырған. Қауіпті жүктерді тасымалдауға арналған ДОПОГ куәлігі де болған.
Сотталушының қызы баллондарға газ құю тәртібіне де тоқталды. Оның сөзінше, әкесі автогаз құю станциясында газ құю шлангісінің қысқышын бір баллоннан екіншісіне ғана ауыстырған. Ал газдың берілуін станция қызметкерлері басқарған.
Іс материалдарында баллондарға 28,5 литр газ құйылғаны көрсетілген. Сонымен бірге сараптама қорытындысында баллонның жарылуына артық қысым мен температураның өзгеруі ықпал етуі мүмкін екені айтылған.
Қорғау тарапы температура жағдайына да назар аударды. Газ құйылғаннан кейін баллондар біраз уақыт жылытылмайтын гаражда тұрған, содан соң кафенің жылы бөлмесіне жеткізілген. Қорғаушылардың пікірінше, температура айырмасы баллон ішіндегі қысымға әсер етуі мүмкін және оқиғаның себебін анықтаған кезде бұл жағдай ескерілуге тиіс.
Ал айыптау материалдарында кафедегі газ жабдықтарының қалай сақталып, пайдаланылғаны туралы мәліметтер бар. Құжаттарға сәйкес, мекемеде қосалқы баллондарды қоса есептегенде, тұрмыстық бес газ баллоны болған. Олардың барлығы ғимарат ішінде сақталған, ал біреуі жылу радиаторының жанына қойылған.
Істе кейбір баллондардың пайдалану мерзімі өтіп кеткені және қажетті техникалық куәландырудан өткізілмегені де көрсетілген. Айыптау актісіне сәйкес, газды бұған дейін жеткізген адам 2025 жылдың күзінде жабдықтарды пайдалану кезінде талаптардың бұзылғанын анықтап, кафемен жұмысын тоқтатқан.
Сотта баллондарға газ құю мен оларды жеткізу жағдайлары ғана емес, кейін қалай сақталып, пайдаланылғаны да қаралып жатыр. Сот әр сотталушының рөлін анықтап, олардың әрекеті мен болған салдар арасында себеп-салдарлық байланыс бар-жоғын белгілеуге тиіс.
Жәбірленушілер үш сотталушының да жауапқа тартылуын талап етіп отыр. Өрттен ұлынан айырылған әкелердің бірі сот отырысында өз ұстанымын білдірді.
«Үш сотталушы да ұлымның өліміне кінәлі деп санаймын. Жаза әділ болады деп үміттенемін», – деді қаза тапқан азаматтың әкесі.
Жәбірленуші тарап іс фигуранттарына ең қатаң жаза тағайындауды, сондай-ақ моральдық зиянды өтеу туралы талаптарды қанағаттандыруды сұрап отыр.
Виктор Домбровский сот барысында қаза тапқандардың отбасыларына көңіл айтты.
«Бұл – көптеген адамның туғаны мен жақынынан айырған үлкен қасірет. Баршаңызға көңіл айтамын», – деді сотталушы.
Іс бойынша сот тергеуі аяқталып, тараптар жарыссөзде сөйледі. Мемлекеттік айыптаушы Виктор Домбровскийді алты жылға бас бостандығынан айыруды сұрады.
Келесі сот отырысы 1 қыркүйекке белгіленді. Сотталушылар соңғы сөзін айтқаннан кейін сот шешім қабылдауға кіріседі. Іс фигуранттарының әрекетіне түпкілікті құқықтық бағаны сот береді. Олардың кінәсі заңды күшіне енген сот үкімімен ғана белгіленуі мүмкін.
