NDTV мәліметінше, іздеу жұмыстары кезінде құтқарушылар үйінді астынан әлсіз дауыс естіген. Артынша олар қирандыларды аршып, қызды аман алып шыққан. Алты жасар қызға оқиға орнында алғашқы медициналық көмек көрсетілгенімен, кейін жағдайы нашарлап, әрі қарай ем алу үшін тікұшақпен Катмандуға жеткізілді. Қазір ол дәрігерлердің бақылауында.
Үш күн бойы үйінді астында жатқан баланың аман табылуы құтқарушыларға үлкен үміт сыйлады.
Су тасқыны мен көшкіндер Непал мен Тибеттің бірқатар аймағында 26 тамызда Гималайдағы мұз, су және тау жыныстарынан тұратын қуатты ағыннан кейін басталған.
Табиғи апат салдарынан үйлер, жолдар мен көпірлер қирап, бірқатар елді мекенде электр жарығы мен көлік қатынасы үзілді. Екі елдің билігі таратқан мәлімет бойынша, қаза тапқандар саны 900 адамға жетіп, 4 мыңнан астам адам хабар-ошарсыз кеткен. Құтқарушылар ең көп зардап шеккен аудандарда іздеу жұмыстарын жалғастырып жатыр.
