Заңды иелеріне ұрланған үш мыңнан астам мал қайтарылды. Министрлік мұндай қылмыстардың ауыл тұрғындарына ауыр тиетінін атап өтті. Өйткені олардың көбі үшін мал шаруашылығы негізгі табыс көзі болып саналады.
Мәселен, тамыз айында Батыс Қазақстан облысында жылқы мен ірі қараны бірнеше рет ұрлады деген күдікпен екі адам ұсталды. Тергеу мәліметінше, олар 15-тен астам мал ұрланған тоғыз қылмысқа қатысы болуы мүмкін.
Болжам бойынша, күдіктілер бақылаусыз жайылып жүрген малды шалғайдағы елді мекенге айдап апарып, сол жерде сойған. Кейін етті сату үшін Ақтөбе облысына жеткізген. Екі күдікті де қамауға алынды.
ІІМ ауыл тұрғындарын малды қараусыз қалдырмауға, бақыланатын жайылым ұйымдастыруға және GPS-трекерлерді пайдалануға шақырды. Сондай-ақ малды уақтылы таңбалап, чип орнатып, мал басын есепке алу ұсынылады. Бұл шаралар ұрлық қаупін азайтып, жоғалған малды жылдам табуға көмектеседі.
