Мәселе Құрылтай отырысында көтерілді. Депутат Мақсұт Насибулов ғылымды дамытуға арналған қаражаттың басым бөлігі депозиттерде сақталып, ғылыми жобалардың уақытылы жүзеге аспауына қатысты түсініктеме беруді талап етті.
Аудит нәтижесінде орталықтың инвестициялық қызметтен 1,6 млрд теңге табыс тапқаны анықталған.
«Самғау» ғылыми-технологиялық орталығының өкілі түскен қаражаттың толық көлеміне ғылыми жобаларды қаржыландыру туралы келісімшарттар жасалғанын мәлімдеді.
Алайда қаржы орындаушыларға бірден берілмейді. Ақша жобаның әр кезеңі аяқталып, атқарылған жұмыс нәтижесі расталғаннан кейін ғана аударылады.
Орталық өкілінің түсіндіруінше, осы аралықта уақытша пайдаланылмай тұрған қаражат заңнамаға сәйкес депозиттерге орналастырылады. Ал одан түскен табыс ғылыми әзірлемелерді қаржыландыруға жұмсалмақ.
Сонымен қатар, орталық өкілі кейбір жобалар бойынша келісімшарт жасау ұзаққа созылғанын мойындады. Бұған өтінім берушілер мен жобаны орындаушылар тарапынан құжаттарды келісу рәсімдерінің ұзақтығы себеп болған.
Мұндай жағдайлардың қайталанбауы үшін қаржыландыру туралы шешім қабылданған күннен бастап 20 күн ішінде келісімшарт жасасу тәртібін енгізу туралы шешім қабылданған.
Сондай-ақ аудит қорытындысы бойынша орталықтың ішкі құжаттарына өзгерістер енгізу жоспарланып отыр.
Осыдан кейін депутат Мақсұт Насибулов ғылыми жобаларға арналған қаражат алдағы уақытта да депозиттерде сақтала бере ме деп нақтылады.
Орталық өкілі қаржыландыру бұрынғыдай кезең-кезеңімен жүргізілетінін растады. Яғни қаражат жобалар бойынша міндеттемелердің орындалуына қарай аударылады.
Талқылау соңында бірінші шақырылымдағы Қазақстан Республикасы Құрылтайының төрағасы Айбек Дәдебай бұл мәселені бақылауға алуды тапсырды.
